KUCHING: Projek Juma’ani In Vitro Orchid Micropropagation (JIVOM) di Maktab Rendah Sains MARA (MRSM) Kuching terus nerima perati lebuh Patron Serakup Orkid Sarawak (Saroso), Dayang Nur Jihan Abang Abdul Rahman Zohari ngatur penemuai keterubah ke makmal enggau taman mini orkid institusyen nya kena Hari Empat.
 
Sapit Prinsipal Pemansang Penau MRSM Kuching, McManus Singh madah, projek JIVOM ti dipejalai enggau kerejasama Serakup Orkid Sarawak nyadi inisiatif beguna dikena ngintu spesies orkid lokal ti majak punas.
 
“MRSM Kuching temegah ati dipilih nyadi pemungkal projek tu. Pekara ti ngemegahka agi, semua proses nanam enggau nyaga diatur bala nembiak ba Makmal Orchid MRSM Kuching,” ku iya.
 
Naka diatu, tig araban nembiak ngaul diri ba projek nya lalu sida disadang ngari ke Malaysia ke siti program antarabansa di Jerman ba taun baru ngambi mantaika asil tungkap sida.
 
Iya nerang, penemuai Dayang Nur Jihan sehari tu meri peransang ngagai raban MRSM Kuching kelebih agi nembiak ti ngaul diri ba projek inovasyen bepuguka STEM nya.
 
“Iya deka ngabas Orchid Garden ti ngembuan lebih 80 spesies orkid nyengkaum sekeda spesies ti nyau deka punas sebedau ngelawa Makmal Orchid.
 
“Penemuai tu dikearap ngerandang mayuh agi peluang dikena ngerembaika projek inovasyen nembiak ke tikas global,” ku iya madah baru.
 
Projek JIVOM, bepun di MRSM Kuching, diatu nyadi semina siti nya aja makmal di Malaysia bejalaika pengawa nanam mikro orkid chara sistematik.
 
Nya seriris enggau juluk MRSM ngemansangka penau nembiak chara holistik nengah akademik, nyadi tuai, inovasyen enggau orang dagang.-EDISI UKAS