SARIKEI: Palan entepan kerita ti baru deka digaga ba Rumah Suda ti deka meri pengelantang ngagai 14 ruang bilik ba rumah panjai nya.
 
Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei, Dato Sri Huang Tiong Sii, madah ke projek nya deka digaga ngena belanja Projek Mesra Rakyat (PMR) 2025 ti deka nyendiaka endur entepan ti lantang enggau berurun agi.
 
Ku iya, kelimpah endur entepan kerita, endur nya mega ulih dikena ngatur pengawa bukai baka nyembi asil utai tanam enggau aktiviti bukai.
 
Ku Kaban Kunsil Nengeri (ADUN) Repok madah baru, pemansang infrastruktur pemun baka nya sebagi ari pengawa ti seruran digaga perintah nentuka pengelantang rayat ba menua pesisir enda diteju.
 
“Projek taba entepan kerita ba pelaman Rumah Suda tu dikearap nambah pengelantang enggau ngemuntangka aktiviti peranak, lalu perintah nengah PMR deka terus ngatur bemacham inisiatif ti ngelantangka rayat, kelebih agi ba rumah panjai,” ku iya. -EDISI UKAS