KUCHING: kontinjen Sarawak besikap napi Lumba Borneo Kuching (BGK) 2025 ukai semina nyelinting teknikal enggau fizikal aja, tang mega pengetan psikologi sereta semangat diri sebilik ba bala atlit.
 
Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu madah, Kem Kontinjen Tim Sarawak ti diatur ba Perkampungan Sukan Sarawak (SSV) kenyau ari dua hari ke udah nyadi pelasar ngempung semua atlit datai ari mayuh pelilih ba nengeri tu.
 
“Nengah kem tu, kitai dekaka sida ukai semina sedia ari sukut latih aja, tang nempa kaul rat enggau pangan diri. Kitai dekaka sida diau baka diri sebilik enggau narak semangat siti tim.
 
“Baka pengerami Gawai taukaHari Raya, semua diri sebilik begempuru enggau sama besaup lalu berami begulai.
 
“Baka nya mega atlit kitai, taja datai ari asal penatai ti bebida, kitai tetap begempung, kitai anak Sarawak,” ku iya lebuh dirandau pemberita pengudah sesyen motivasyen kem nya, ditu, Hari Empat.
 
Dato Gerald madah, kem nya mega nyendiaka program motivasyen ninting malam kelimpah latih intensif, enggau sukung fasiliti meruan di SSV.
 
Iya nerang, pakar nutrisi, fisioterapi, kaunselor sereta sukung sains lumba disedia nentuka sida tetap regas enggau ransing ati nyentuk hari pekit nyadi.
 
Iya mega madah ke BGK 2025 ukai semina kelang main enggau lumba aja, tang mega negapka kaul serumpun ba Pulau Borneo.
 
“Enti sema kaul manah terus ditarak, pemaik ukai semina ba pekara lumba aja, tang mungkur ekonomi enggau pengelikun,” terang iya.
 
Berindik ari nya, iya ngarap ke semua atlit Sarawak terus nyaga disiplin, ransing bepekit enggau tegap ba runding ngambi ulih mai nengeri tu pegari nama.-EDISI UKAS