KUCHING: Bini Yang di-Pertua Negeri Sarawak, Toh Puan Datuk Patinggi Fauziah Mohd Sanusi sehari tu nerima penemuai basa ari Serakup Indai Tunggal Sarawak (PITSA) di Astana Negeri Sarawak.
 
Delegit PITSA betuai ke Presiden, Salmah Ibrahim disempulang Kaban Kaunsil Pemegai Taruh, Toh Puan Hayati Ahmat, Datuk Seri Sharifah Mordiah Tuanku Fauzi enggau Datin Seri Mariam Balan Seling.
 
Delegit mega bisi nerang asal pengawa numbuhka serakup nya sereta pemar ditapi bala indai tunggal ba nengeri tu.
 
Toh Puan Datuk Patinggi Fauziah mending enggau besilih penemu begulai enggau delegit.
 
Iya mega meri tabi puji ngagai PITSA ti betatika nasip indai tunggal sereta pangku pengawa serakup nya ba pemansang sosial nengeri nengah program latih, kus, woksyop enggau seminar.
 
Sama nemuai, Sapit Presiden PITSA Horry Bujang, Sekretari Dipebasa Jemilah Let, Penulung Sekretari Dipebasa Jayah Hassan, Tukang Wang Dipebasa Netti Sahari, Penulung Tukang Wang Dipebasa Sa’amah Adis sereta bala kaban komiti ke bukai.-EDISI UKAS