BINTULU: Peranak Bintulu diperansang enda ngemata ke pemansang deras ti benung nyadi, tang sama gawa ngatur pemujur mengeri nya dudi hari.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, rayat lokal ti regas ngaul diri beguna endar nentuka asil pemansang endang amat meri pemaik ngagai komuniti dia.
Iya meransang rayat meda pemansang ti benung nyadi nya peluang dikena negapka diri ari nambah penemu enggau pengelandik, lalu nyadi sebagi ari pejalai pemansang nya empu.
“Aku enggai meda rayat Bintulu kena kepit pemansang, tang sida patut regas agi ngaul diri. Kitai dekaka sida ransing agi gawa, sama ngasai asil pemansang ti benung nyadi,” ku iya.
Iya nibar ke jaku nya ngagai media lebuh ngulu raptai penuh Ngintu Pengerami Hari Malaysia Renggat Sarawak 2025 ba taba Padang Bilun Lama, ditu Hari Minggu.
Berebak enggau nya, Dato Sri Dr. Stephen Rundi mega bekunsi peneleba diri meda empu transformasyen Bintulu ari siti pasar orang berikan mit enggau penyampau tubuh peranak urung 5,000 iku, ngagai siti mengeri industri besai di Malaysia.
“Ari pemisi Taman Perindustrian Samalaju enggau disikap bemacham perengkaguna bukai, Bintulu diatu dikemegah semua rayat Sarawak," terang iya.
Ngenang pasal Ngintu Pengerami Hari Malaysia Renggat Sarawak, iya madah ke semua pengawa besikap diatu udah ba renggat kepenudi.
Iya mega muji semangat kerejasama bala komiti pengatur enggau pengeregas pupu komuniti ngaul diri, nadai ngira raban bansa enggau pengarap ngemujurka pengerami nya.
Sama datai meda raptai penuh sebedau hari pengerami nyadi ti ditaga diatur 16 September, pukul 8 malam nya Sapit Sekretari Perintah Sarawak (Operasyen) Datu Hii Chang Kee, Residen Bagi Menua Bintulu Datu Nyurak Keti, Direktor Unit Protokol, Istiadat enggau Pengatur Achara Sarawak (UPPANS) Datu Hamdan Sharbini sereta sekeda temuai dipebasa bukai.
Pengerami nya ila disadang richah enggau penatai Yang di-Pertua Negeri Sarawak Tun Pehin Sri Dr Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi, sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.-EDISI UKAS
