KUCHING: Tourism Malaysia udah bejadika Pakej Dagang Temuai Sarawak Delta Geopark enggau Gawai 2024 dikena mantaika penyelai produk dagang temuai geopark sereta Pengerami Nyambut Hari Gawai di Sarawak ngagai temuai menua enggau antarabansa.
Direktor Pemansang Pakej Tourism Malaysia, Mohd Roslan Abdullah madah, bisi 37 pakej dagang temuai udah digaga enggau saup 13 ejensi ari Sarawak enggau Semenanjung Malaysia ti nyediaka program ngabas geotaba, taba biologi enggau taba main asal ba geopark ti nyengkaum pelilih Kuching, Bau enggau Padawan.
Ku iya, pakej ke digaga nya sebagi ari pengawa ngerembaika palan dagang temuai seririh enggau pengawa nyikap diri sebedau program Taun Ngabas Malaysia 2026.
“Pakej ti disediaka iya nya Pakej Geological, Heritage & Exploration @ Sarawak Delta Geopark, Pakej The Hidden Prehistory & Geological Sites @ Sarawak Delta Geopark, Pakej Cloud Glamping @ Sarawak Delta Geopark, Pakej Nature & Cultural @ Sarawak Delta Geopark, Pakej Gawai Open House At Matop Longhouse, Pakej Babulang Festival In Limbang enggau Pakej Irau Aco Lun Bawang Festival.
"Pakej nya udah diadu nyadi ‘brochure’ dagang temuai ‘Sarawak Delta Geopark & Gawai 2024’ ke mega ulih dipeda ba laman Tourism Malaysia ba www.malaysia.travel,” ku iya maya bejaku ba pengerami bejadika pakej nya di Kuching, Hari Dua.
Kelimpah ari nya, Mohd Roslan madah, bala temuai ke meli pakej tu mega ulih ngasaika pengerichah Hari Gawai nyema sida datai ke Sarawak maya pengerami nya diatur.
“Pakej unik tu ulih matak temuai menua tauka antarabansa ngagai Sarawak enggau Malaysia nyadi palan dagang temuai,” pia ku iya ba aum media udah pengawa bejadika pakej nya.
Bela atai, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Datu Sherrina Hussaini, Tuai Pegawai Eksekutif Sarawak Tourism Board (STB), Sharzede Datu Salleh Askor, Sapit Direktor Kampung Sarawak, Semilan Ripot sereta ke bukai.
Sarawak Delta Geopark dituku nyadi geopark menua keenam kena 20 Jun 2022 alai 3,112 kilometer pemesai nyengkaum 28 geotaba, 12 taba biologi enggau 14 taba main asal. -EDISI UKAS
