Lebih 10 taun enda diatur, pekit enggau lumba pemadu besai ngempuru atlit ari selampur Pulau Borneo sekali agi datai baru. Taun 2025 nurai sejarah Sarawak ke dikeandal nyadi tuai rumah ngatur lumba nya, Borneo Games, ti ukai semina ngayanka pengulih atlit besemekih tang nyadi pelasar negap kaul enggau daya idup Borneo.
 
Sejarah Borneo Games

Borneo Games ngundan mayuh sejarah enggau leman jerita. Keterubah, lumba tu suba diatur Seria Recreation Club (SRC) ba taun 1954 di menua Brunei Darussalam. Maya nya bisi tiga iti tim tauka menua ngambi bagi iya nya Brunei Darussalam, Sarawak enggau North Borneo (Sabah).

Belabuh ari nya, lumba tu diatur nyauka ninting taun ba taun 1950-an nyentuk 1960-an. Alai ngatur lumba tu digaga begintir ba mengeri besai di Borneo baka ba Kota Kinabalu, Kuching, Seria, Tanjung Aru, Tanjung Lintang sereta mengeri ke bukai.

Pekit tauka lumba diatur lebih agi baka main bol, badminton, ‘basketball’, olahraga enggau badminton.

Tang ba taun 1970-an, lumba tu majak napi penanggul, nyengkaum ketegal pekara logistik enggau penanggul pemayuh penyereta. Tu ngepunka lumba tu ‘ngetu’ enda lama sebedau diatur baru ba taun 2005. Ba taun nya, lumba tu diatur lebih agi moden sereta betikas besai ti ukai semina digulu penyereta ari menua Borneo aja tang bela nerima penatai kontinjen ari Semenanjung Malaysia.

Bepun ari taun nya, lumba tu diatur berengkah di Sabah (2005), Sarawak (2007), Brunei Darussalam (2009), Samarinda, Kalimantan Timur (2011) enggau Labuan (2013).

Taja pia, udah kepenudi di Labuan, lumba tu pulai nadai ‘didinga’ agi.
 
Sarawak Tuai Rumah Ngatur Borneo Games 2025



Diatu, udah 12 taun, Sarawak dipilih nyadi tuai rumah ‘ngangkatka’ baru lumba tebilang Pulau Borneo nya. Semua tu bepun ari sukung tegap Perintah Sarawak empu. Semua tu datai ari penemu Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg maya iya bejaku ba Pengerami Makai Lemai Lumba Malaysia (SUKMA) XXI Sarawak 2024 di Kuching, taun siti suba.

Ku iya, Sarawak bisi ati deka ngatur baru Borneo Games lalu mutus melanja lumba nya.

Lalu taun tu, bepun ari pengeransing deka meda lumba nya diatur baru, Sarawak dipadu nyadi tuai rumah. Menteri Raban Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah dikeandal nyadi patron Borneo Games 2025. Iya disempulang Sapit Menteri Raban Nembiak enggau Lumba Sarawak ke mega nyadi Chairman Komiti Lumba, Dato Gerald Rentap Jabu.

Ngena ungkus belanja manggai RM7.5 juta, lumba ke sekali tu diatur berengkah ari 24 ngagai 28 September tu ila deka digulu kontinjen Sarawak, Brunei Darussalam, Sabah, Wilayah Persekutuan Labuan enggau Provinsi Kalimatan Timur.

Enggau penatai semua kontinjen ari selampur Pulau Borneo nya, Borneo Games 2025 deka nyadi pelasar ngempung pengering ba lumba, daya idup nyengkaum diplomasi rantau Borneo.
 
Pekit

Lumba serak tu dirichah sereta ngayan main moden betikas antarabansa enggau main lama tauka main asal Borneo.
Tu nyengkaum Akuatik (Nyemerai), Badminton, Olahraga, ‘Archery’ enggau ‘Lawn Bowls’.

Main lama iya nya Batak Tali enggau Nyumpit.

Kelimpah ari nya, main ungkup temuai dipebasa (VIP) bela diatur ke sekali tu ba Kelab Golf Sarawak, Petra Jaya.

Semua main tu mandangka pengelain enggau pengelebih dikembuan Borneo Games ti ukai semina ngayanka pengelebih enggau pengeregas atlit tang lebih agi deka ngerami sereta ngangkat pesaka enggau identiti main lama rayat Borneo.
 
Palan Lumba Betikas Dunya

Palan endur bepekit tu diatur ba Kompleks Lumba Petra Jaya ti ngembuan perengka guna moden sereta betikas antarabansa. Stadium Sarawak deka nyadi palan pekit olahraga lalu Stadium Perpaduan deka nyadi gelanggang badminton.

Palan Akuatik Pandelela Rinong disadang nyadi menalan atlit biak besemekih enggau pangan diri ba pekit nyemerai. Kelimpah ari nya, Arena Lawn Bowl dipilih alai pekit Lawn Bowls.

Padang B, dipelabaka deka richah enggau penatai bala penyukung kontijen pekit Batak Tali enggau Nyumpit. Main lama ti agi dikemeran nyentuk diatu.
 
Ukai Semina Lumba Tang Kelai Pemanah Kaul

Borneo Games 2025 dipeda enda semina nyadi pelasar mantaika pengelebih ba lumba enggau main tang nyadi kelai pemanah kaul menua ti Borneo. Nengah lumba, penatai pengidup ke enda sebaka, baik nya ari jaku enggau daya idup tang ulih duduk sepiak enggau pangan diri, besemekih, bepekit enggau ati rindu lalu temegah ati begulai bebala mayuh.

Rambai jaku ‘Segulai Sejalai’ mai pesan ti nyemetak, pengering Borneo datai ari penyerakup. Lumba tu bela dikeandal nyadi pemun nyidi pengelandik baru. Tu awak ke engkeman dikena atlit biak ari ulu sungai ngangkatka diri ba pekit betikas nasional enggau antarabansa.
 
Singkang Ngelawa Pengelantang Dudi Hari

Borneo Games 2025 ngemunka baru singkang ngelawa pemujur dudi hari. Pengandal ke dibai ba lumba tu ukai semina deka ngangkatka penyulut lumba nya suba tang nyadi pelasar ke chukup engkeman nengkebang pemujur dudi hari.

Nyema lumba tu ulih diatur enggau meruan tauka konsisten, nadai kebuah iya tau baka lumba betikas besai ke bukai nyengkaum Lumba SEA.

Ukai semina nya, sukung ari Perintah Nengeri enggau Perintah Besai lalu disungkak kerejasama antarabansa ari selampur Pulau Borneo, Borneo Games bisi pengulih nyadi kelai tauka ikon lumba di rantau tu.
 
Ekonomi

Kelimpah ngira pemaik ari pekara pekara lumba, Borneo Games 2025 bela disadang mai penguntung bukai lebih agi ba pekara ekonomi rayat Sarawak empu. Penatai bala atlit, jurulatih enggau bala penyukung ari menua bukai sepemanjai lumba nya diatur tau bendar mulaika penguntung ngagai sektor dagang temuai, dagang mit enggau ekonomi kreatif.

Hotel, kedai makai, restoran, kafe enggau ‘homestay’ disadang penuh lalu pia mega industri bukai baka servis perengka pengangkut, program nemuai enggau ekodagang temuai bela ngasaika penguntung maya tu.
 
Enti berati enggau silik agi, beratus iti pengawa puang sementara bisi maya lumba tu. Ari teknikal, logistik tauka hospitaliti. Semua tu tau bendar nambah penatai pemisi lebih agi ba raban nembiak.

Tang ke beguna diatu iya nya, perengka guna lumba betikas antarabansa baka Stadium Sarawak enggau Palan Akuatik Pandelela Rinong deka dikena enggau manah, nempa Kuching nyadi hab lumba rantau tu.
 
Pengarap & Pengandal

Pemutus ngatur Borneo Games 2025 ukai semina nyidi sereta nyungkak pengelandik enggau penau atlit biak ba panggau lumba, tang lebih agi ari nya, nyadi panggau nyintal lalu negap kaul diplomatik enggau daya idup Borneo nengah jaku Segulai Sejalai.

Borneo Games 2025 nyadi kelai ti nyengala dipeda, lumba tau bendar nempa kaul kilah entara menua, nengkebang pengelantang dudi hari.

Lumba tu ngangkatka baru ‘pesaka’ ti nyauka lenyau, nyantil baru kaul iya ke kala tebeleka enda lama. Awak tu ungkup rebak baru bela berasai temegah ati nyadi anak Borneo. Sejarah deka diturai lalu di Kuching, semua tu berengkah baru!-UKAS