BETONG: Komiti Penyangga Penusah Nengeri Sarawak (JPBNS) deka beratika peminta bantu dikena ngaga rumah baru tauka rumah panjai sida ke tasah angus enggau lengkas.
Chairman JPBNS ke mega Sapit Premier Sarawak, Datuk Amar Douglas Uggah Embas madah, komiti deka nentuka penyampau bantu nya udah iya nerima ripot ari Opis Residen.
“Maya nerima ripot nya ila, baru sida JPBNS berundingka pemutus nya dalam kandang seminggu.
“Perintah nengeri bisi program manggai RM70,000 ungkup bantu nya.
“Bantu nya diberi ngagai tiap rumah siku-siku tauka unit siku-siku ba rumah panjai,” ku iya.
Iya nerangka pekara nya maya ngabas Charles Tegalang di Nanga Tiga ke tasah angus, Hari Dua.
Dulu ari nya, Datuk Amar Douglas disempulang Kaban Parlimen Betong Dr Richard Rapu nyuaka bantu ari Ejensi Pemansang Pelilih Betong (BDDA) sepenyampau RM388,000 ngagai kontraktor dikena ngemanahka jalai ladang Kebun Cina di Spaoh.
Datuk Amar Douglas mega madah, ari taun siti tadi nyentuk taun tu, BDDA udah ngungkupka sepenyampau RM30 juta dikena ngemanahka urung 73 jalai sawit, lada enggau getah ba sitak Bukit Saban.
“Kami mega arap, kami ulih mantu semua pekebun ngemansangka kebun sida nyadi lebih produktif,” ku iya. -EDISI UKAS
