SARIKEI: Gempuru Hari Kebangsaan Renggat Sarawak 2025 deka mandangka sukut inklusiviti nyadi elemen besai enggau ngemeratka penyerakup enggau pengawa begulai entara komuniti pupu bansa.

Penyelai sukut inklusiviti tu nyata dibantai nengah raptai penuh ba pelaman Balai Suarah Sarikei kena Hari Enam.

Raptai nya ngemata bala nembiak sekula, raban nembiak sereta staf teknikal ngaul diri lalu begulai nentuka atur pengawa lanchar Hari Minggu tu.

Pengawa meresa udah dipejalai nyengkaum sistem bunyi, pengelikun sereta tusun pengawa dikena nyeliahka sebarang pekara enda disadang nyadi.

Sapit Menteri Pemansang Mengeri enggau Pengeraja Asal Sarawak ti mega Sapit Menteri beempu tanggungpengawa, Datuk Len Talif Saleh ti datai matau pejalai raptai nya tepantup ati enggau penyikap sereta muji komitmen semua raban nentuka semua nya dipejalai nitih perambu ti ditetap.

Sama datai iya nya Direktor Unit Protokol, Istiadat enggau Atur Pengawa Sarawak, Datu Hamdan Sharbini.

Gempuru Hari Kebangsaan Renggat Sarawak 2025 pagila disadang dipenyadi Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi lalu digulu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta raban kabinet Sarawak.-EDISI UKAS