SIBU: Tanggungpengawa pegawai perintah ukai semina bekaul pengasi atur pengawa tang nyerangkung pengawa mereti ke atur undang-undang sereta faktor sejarah ti nyadi pugu numbuh agensi sida.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar nyemetak madah, mayuh pegawai bejalaika pangku pengawa lalu enda mereti ke pugu atur undang-undang enggau sejarah penumbuh institusyen sida.

" Enda chukup nyema siku pegaqai ti sikar tauka tuai ti bepenau. Kmsida meseti mereti ke atur undang-undang ti numbuhka agensi nya.

"Sida mega meseti mereti ke sejarah ti mai ngagai pengawa ngaga atur undang-undang nya enggau numbuh agensi nya. Lebih ari nya, sida meseti belemati ke reti atur undang-undang nya, niat ti meri pengidup ngagai genap leka jaku nya.

“Tambah mega, IKEA mega meri manual tauka chara masang jemari nya ngambi ulih diadu manah. Ba atur perintah, 'manual' nya jauh kompleks agi. Enti salah singkang, empas deka besai agi," ku iya.

Iya madah munyi nya lebuh ngenatai Syarahan Negarawan di Universiti Teknologi Sarawak (UTS) ditu kena Hari Enam.

Tun Pehin Sri Dr Wan Junaidi mega nyemetak madah, taja pen sekeda pekara dipeda lanchar ba mua tang nya engka udah tepawah ari tuju asal.

"Nya kebuah genap agensi diberi undang-undang nerit atur sekali ke Akta Parlimen tauka Ordinan nyadi malin nyaup sida bejalaika tanggungpengawa nemban agi," ku iya.

Sama datai iya nya bini Yang di-Pertua Negeri Sarawak, Toh Puan Datuk Patinggi Fauziah Mohd Sanusi, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapa’ee sereta Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam), Datuk Dr Abdul Rahman Junaidi.-EDISI UKAS