BINTULU: Mensia mayuh diperansang ngelawa Sarawak Agrofest 2025 ti diatu benung diatur ba taba Padang Bilun Lama Bintulu ngambi berati ke pemansang sektor betanam betupi Sarawak ti deras mansang.

Kaban Kunsil Nengeri (ADUN) Tanjong Batu, Pang Leong Ming madah ke pengawa besai nya ukai semina mandang bemacham kereban sereta teknologi betanam betupi pemadu baru tang mega mandangka produk lokal ti nyelai enggau bisi kualiti ari selampur Sarawak.

"Pengawa baka tu meri peluang ngagai komuniti berati ke pemansang sektor betanam betupi seraya ngelala pengeraja asil bumi nengeri kitai ti kaya enggau bisi pengulih besai," ku iya lebuh ngelawa Sarawak Agrofest 2025 ditu kena Hari Lima.

Iya mega meri terima kasih ngagai institusyen pelajar ti bejalaika inisiatif mai nembiak ngulu penemuai seraya belajar ngagai pengawa nya.

Ku iya, inisiatif nya dipeda ulih terus nambah penemu rebak biak bekaul pengawa betanam betupi enggau teknologi gadung.

Sarawak Agrofest 2025 diatur belabuh ari 22 ngagai 31 Ogos besulu ke jaku Pengawa Betanam Betupi Industri Nengah Teknologi Pintar lalu disadang matak penatai lebih 500,000 pengusung ditu enggau luar nengeri. -EDISI UKAS