PADAWAN: Perintah Sarawak udah ngungkup RM60 juta dikena ngaga begunan opis baru Kaunsil Mengeri Padawan (MPP) di Batu 12, Jalai Kuching-Serian.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, belanja tu diberi nengah belanja Pelin Pemansang Malaysia Lumpar Ke-12 (RMK12) dikena ngepunka dua pakej ba renggat keterubah ngaga begunan MPP baru tu ila.

“Maya berandau enggau Dato Ir Lo Khere Chiang sereta sida penyanding penemu, aku dipadah ungkus kesemua ngaga begunan nya sepenyampau RM70 juta ke alai sida ngembuan belanja mimit tang agi begunaka RM60 juta, lalu aku ngemendarka peminta sida dikena ngaga begunan baru tu,” ku iya.

Iya madah munyi nya maya bejaku ba Program Nasih Tanah Opis Kaunsil Mengeri Padawan (MPP) Baru ditu, Hari Empat.

Nitih ku Datuk Patinggi Abang Zohari, Perintah Sarawak deka terus ransing ngiga belanja bukai ketegal projek ngaga opis MPP baru tu deka bisi lima renggat, kelimpah Kaunsil Pelilih Serian (MDS) enggau Kaunsil Mengeri Kota Samarahan (MPKS) mega ngembuan juluk ati bisi begunan opis diri empu ke deka dipadah ila.

“Tu (belanja) ungkup renggat keterubah lalu Chairman MPP, Tan Kai baru aja nyebut renggat ke bukai deka digaga. Nya alai, dikena nangkup peminta tu, Perintah Sarawak meseti bisi penatai belanja ke lebih.

“Diatu, Sarawak ngembuan penatai pemisi lebih tang nya patut ditambah agi ketegal ngira mayuh pemansang digaga kitai, lalu tu baru ungkup Padawan, bedau agi nyengkaum peminta Chairman MDS, Dato Peter Minos di Serian enggau MPKS ke alai kitai udah besetuju deka ngaga begunan sida empu,” ku iya madah baru.

Dulu ari nya, Tan Kai madah, renggat keterubah projek tu bisi dua pakej, iya nya pengawa meresi taba ke udah berengkah Julai 2025. Lalu pakej kedua deka berengkah ba suku kedua taun dudi ngaga begunan semilan ringkat ke disadang tembu dalam kandang timpuh tiga taun.

Kelimpah ari nya, renggat kedua deka mungkur pengawa ngaga begunan perengka guna mensia mayuh dua ringkat, renggat ketiga nyerangkung pengawa ngaga sebuah amfiteater tebuka sereta ‘wetland pond’, renggat keempat ngaga makit festival lalu renggat kelima iya nya pengawa ngaga palan lumba.

Sama datai, Sapit Premier Sarawak Datuk Amar Profesor Dr Sim Kui Hian, Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Dr Penguang Manggil, Sapit Menteri Pengangkut Sarawak ke mega Kaban Kunsil Nengeri (ADUN) Mambong Datuk Dr Jerip Susil, Sapit Menteri Kuasa enggau Pemeruan Rampa Menua Datuk Dr Hazland Abang Hipni, ADUN Stakan Datuk Hamzah Brahim, ADUN Batu Kitang Dato Ir Lo Khere Chiang, Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal Sarawak Datu Elizabeth Loh, Chairman MPP Tan Kai sereta temuai dipebasa ke bukai. -EDISI UKAS