KUCHING: Sarawak besedia nyadi tuai rumah alai ngatur Borneo Games Kuching 2025 ari 24 ngagai 28 September tu ke digulu penyereta empat buah menua di Borneo iya nya Brunei Darussalam, Sabah, Labuan enggau Kalimantan Timur.

Sekretari Mendam Opis Menteri Nembiak, Lumba enggau Pemansang Orang Dagang, Morshidi Fredrick madah, program tu diatur baru pengudah lebih 10 taun ngetu kenyau 2013 ti kepenudi iya diatur ba Labuan.

Ku iya, pengawa ngatur Borneo Games Kuching ukai semina dipeda nyadi pelasar ngangkat pengerindu ba lumba tang mega ngenegap penyerakup rayat Borneo.

“Borneo Games sekali tu ukai semina palan alai nguji pengulih atlit, tang mega pelasar dikena atlit biak nyungkak pengelandik sida,” ku iya maya program Juh Randau ke diatur Unit Komunikasi Awam Sarawak (UKAS) ditu, kena Hari Tiga tu tadi.

Iya madah, program nya disadang deka nyungkak ekonomi Sarawak nengah penatai atlit, jurulatih sereta penyukung ari menua bukai sepemanjai lumba diatur.

Ungkus dikena ngatur Borneo Games tu manggai RM7.5 juta.

Lalu sekali tu bisi tujuh bansa lumba deka dipekit iya nya olahraga, akuatik nyemerai, badminton, ‘archery’ enggau ‘lawn bowls’ sereta dua main asal iya nya batak tali enggau nyumpit. Main golf diungkup ngagai temuai VIP.

Sebagi ari palan endur bepekit iya nya Stadium Sarawak Petra Jaya, Stadium Tertutup Perpaduan, Pusat Akuatik Pandelela Rinong, Sarawak Arena Archery, Padang D Kompleks Sukan Petra Jaya, Sarawak Lawn Bowls Arena sereta Kelab Golf Sarawak.

Morshidi madah, pengawa nyikap ngatur lumba nya mega bisi nerima kerejasama ari Kaunsil Lumba Sarawak (SSC), gerempung lumba nengeri sereta komiti teknikal bepeneleba, lebih agi ba pengawa ngatur program besai baka Lumba Malaysia (SUKMA) 2024 dikena nentuka standard pekit nitih standard antarabansa.

Kelimpah ari nya ku iya, latih khas pengereja pengawa voluntia deka dipejalaika pun September tu, lalu atlit direjista online nengah Sistem Pengatur Lumba ke ditutup kena 29 Ogos tu.

Dikena ngerichahka agi Borneo Games tu, mensia mayuh bela diperansang bejualka krafjari enggau produk pemakai Sarawak.-EDISI UKAS