KUCHING: Perintah Malaysia enggau Brunei Darussalam agi berandau ke siti pas pejalai khas dikena ngemuntangka atur pejalai, lebih agi ari Sarawak enggau Sabah.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ari randau nya, Malaysia enggau Brunei Darussalam udah nemu chara mutar pekara nya lalu deka dipadah nangkan tu ila.
Nitih ku iya, dua buah menua tu udah besetuju numbuh pejalai nadai ditagang tama ngena pas nya.
“Kitai tadi bisi berandau bekaul Malaysia enggau Brunei, keterubah iya pejalai tama tauka pansut entara dua buah menua tu udah bisi chara, ke deka dipadah ila, tang naka tu sama udah besetuju.
“Pekara tu digaga ketegal ngira selalu pulai mansang ngagai Brunei, nya alai, Malaysia udah ngatur pengawa berandau enggau menua nya ngambi numbuhka ‘seamless travel’ nengah pas ti sah nyangka dalam timpuh dua ngagai tiga bulan ungkup jalai ngagai Brunei ari Sarawak,” ku iya.
Iya madah munyi nya maya dirandau pemberita pengudah bejadika Konferens Kursi Sheikh Othman Sarawak ke diatur di Kompleks Islam Sarawak, ditu, kena Hari Tiga tu tadi.
Bela datai, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni, Yang Dipertua Kaunsil Islam Sarawak Datuk Misnu Taha, Mufti Sarawak Datu Kipli Yasin, Direktor Opis Pengarap Islam Sarawak (JAIS) Mual Suaud, Sapit Mandal Chanselor (Pekara Rentayan Industri enggau Mensia Mayuh) Universiti Kebangsaan Malaysia Profesor Ts Dr Faizal Mohamad sereta temuai dipebasa ke bukai.
Nitih ku Datuk Patinggi Abang Zohari, pas tu mega deka meri pemaik ngagai rayat di Sabah ketegal ngira nengeri nya bela sepiak Brunei Darussalam.
Dulu ari nya, Menteri Besai Dato Seri Anwar Ibrahim ba Facebook iya, bekunsika pengawa betemu begulai enggau Sultan ke mega Yang Di-Pertuan Negara Brunei Darussalam, Kebawah Duli Yang Maha Mulia Paduka Seri Baginda Sultan Haji Hassanal Bolkiah Mu’izzaddin Waddaulah ibni Al-Marhum Sultan Haji Omar ‘Ali Saifuddien Sa’adul Khairi Waddien ti bisi berandauka pekara bekaul entara garis menua, bidang kerejasama komersial ti nyerangkung sektor kuasa, pekara maritim, dagang sereta pengawa beranakka puku.
Berindik ari nya, Premier Sarawak mega bela madah bekaul kaul kerejasama sektor kuasa enggau Brunei Darussalam.
“Kedua iya, kitai deka nyambung karan ke Brunei Darussalam ngena grid 275 kilovolt (KV) ti disambung ari Tudan ngagai Kuala Belait,” ku iya madah baru. -EDISI UKAS
