BARIO: Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil ngatur penemuai gawa ngagai Palan Muai Uras “Asher Machine” di Bario dikena merati pengawa ngatur teda ke dipejalai Kaunsil Mengeri Miri, Hari Dua tu tadi.

Iya ke mega Kaban Kunsil Nengeri (ADUN) Marudi madah, ngena injin Asher tauka incinerator sebagi ari chara praktikal ke dikena ba menua ulu baka Bario lalu nyadi mutar pemadu manah ngatur uras ba rumah panjai tauka genturung menua ke jauh.

Ku iya, kerejasama komuniti besai amat reti, lebih agi ngemeran konsep 3R (Reduce, Reuse, Recycle).

“Pengawa ngatur uras ti efektif patut diperati sebedau rampa menua majak dikeruga,” ku iya.

Kelimpah ari nya, iya bela ngabas projek ngaga palan muai uras ke baru di Bario, sebagi ari projek rayat dikena nentuka pemeresi sereta pemeruan rampa menua ba sitak nya.

Bela datai, Pemancha Caleena Sakai, Tuai Genturung Pendiau Kelabit Bario, Kaunselor Lian Tarawe enggau Kaunselor Lilla Raja begulai enggau pengari Kaunsil Mengeri Miri.-EDISI UKAS