KUCHING: Perintah Sarawak udah ngagihka lebih RM10 bilion ungkup projek bekal ai ba Sarawak.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak kediri empu udah ngungkup belanja sepenyampau RM6 bilion dikena bejalaika projek loji meresi ai.
Iya madah, projek nganti sistem paip lama begunaka belanja sepenyampau RM1.1 bilion sereta pejalai projek sistem grid ai manggai RM2 bilion ditambah enggau sekeda projek bekal ai baka sistem bekal ai menua pesisir ari baruh projek Bekal Ai Alternatif Sarawak (SAWAS).
"Enti dikira, dipelaba manggai RM10 bilion.
"Projek loji meresi ai RM6 bilion lalu projek nganti sereta nyeleti sistem paip selampur Sarawak begunaka belanja RM1.1 bilion.
"Tambah ke agi enggau sistem grid bekal ai ti manggai RM2 bilion, dichampur agi enggau projek bukai, semua nya manggai RM10 bilion.
"Semua tu ngena belanja kitai empu, nya alai ukai muntang deka ngiga duit, tang semua bejalai enggau mujur," ku iya maya aum media pengudah tembu Program Bejadi Numbuh Sarawak Water Sdn Bhd di Palan Konvensyen Borneo Kuching (BCCK) ditu, Hari Dua.
Ditanya senentang kemaya projek sistem paip ti dipejalai tembu, Datuk Patinggi Abang Zohari madah ke perintah Sarawak ngembuan juluk projek nya tembu abis ba taun 2030 sama enggau projek bukai baka konektiviti jalai alun Pan Borneo enggau Jalai Tebing Tasik.
Kelimpah ari nya, iya mega ngelanggur data sistem paip ti dipejalaika deka disimpan ba Palan Data Sarawak dikena dudi hari.
Ku iya, nya pengudah ngenang lebuh mayuh projek jalai alun ti dipejalaika ngasuh penanggul bekal ai ketegal nadai data palan sistem paip lama ke ulih digiga.
Sama datai, Sapit Premier Sarawak Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, Menteri Utiliti enggau Telekomunikasyen Sarawak Dato Sri Julaihi Narawi, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Sarawak, tuai opis perintah sereta pemesai bukai. -EDISI UKAS
