KUCHING: Sarawak Water Sdn Bhd ditumbuh nyadi sebagi ari pengawa strategik dikena nentuka atur bekal ai ti komprehensif agi sereta meruan ungkup rayat sereta industri di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, dua pekara besai ti matak pemeranak puku beranakka puku ba Sarawak, iya nya ai enggau kuasa, kelimpah pengereja pengawa ti bisi kualiti.
"Kitai enda nemu enti sema dudi hari palan data
deka datai ngagai Sarawak, tang sida mega begunaka ai, lebih agi ai chelap dikena sistem penyelap.
"Kitai meseti berunding jauh ke mua, dikena industri baru dudi hari ke begunaka ai," ku iya maya bejaku ba Program Bejadi Numbuh Sarawak Water Sdn Bhd di Palan Konvensyen Borneo Kuching (BCCK) ditu, Hari Dua.
Nya alai, ku iya, Sarawak meseti ngembuan siti entiti ti ulih ngatur ai ungkup rayat, sereta ai ungkup guna industri.
Berebak enggau nya, Datuk Patinggi Abang Zohari nyemetak madah ke pengawa meresa ai ti dikena baru ti ulih diguna ba pengawa besehari-sehari sida.
Ku iya, sida udah bekenaka chara nya ba siti ari kandang berumah di Santubong, ke alai rumah ti ngembuan mekanisme khas nimbun ai ujan ke disimpan ba dalam tangki ke dilangkar khas.
"Ai nya ulih dikena ungkup guna bukai lalu ba maya ti sama tau diberesi baru ti disebut kitai ai dikena baru ke tau diguna baru.
"Inisiatif tu sebagi ari agenda ekonomi meruan kitai, ketegal nya kitai begunaka siti entiti khas dikena nisih semua pekara tu," ku iya.
Ba batang program, Premier Sarawak mega bejadika logo baru Sarawak Water sereta bejadika aplikasyen Sarawak Water Mobile App.
Pengawa bejadi aplikasyen nya dikena nyungkak kualiti servis baka muntangka penguna matau penyampau ai dikena tiap hari lalu mega alai mayar bil nengah chara 'online' ti muntang agi.
Sama datai, Sapit Premier Sarawak Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, Menteri Utiliti enggau Telekomunikasyen Sarawak Dato Sri Julaihi Narawi, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri Sarawak, tuai opis perintah sereta pemesai bukai. -EDISI UKAS
