KUCHING: Sarawak Water Sdn Bhd mujur ditumbuh ngempung Kaunsil Ai Kuching (KWB), Kaunsil Ai Sibu (SWB) enggau LAKU Management Sdn Bhd (LAKU) nyadi siti entiti.
Menteri Utiliti enggau Telekomunikasyen Sarawak Dato Sri Julaihi Narawi madah, pengawa ngempung nya berengkah 1 Ogos tu tadi enggau Sarawak Water ditumbuh nyadi kompeni bekal ai sereta ngererak KWB enggau SWB.
"Tuju langgur tu ngenegap sistem ngatur bekal ai ti efektif agi di Sarawak nyengkaum struktur organisasyen, ngatur reta, pemeruan pekara wang sereta ngemantup ati penguna servis," ku iya.
Iya madah munyi nya maya bejaku ba Program Bejadi Numbuh Sarawak Water Sdn Bhd di Palan Konvensyen Borneo Kuching (BCCK) ditu, Hari Dua.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah datai bejadika program nya.
Iya mega madah, siti ari agensi bekal ai iya nya Opis Bekal Ai Menua Pesisir (JBALB) mega tetap nyadi agensi perintah Sarawak ti ngatur pengawa ngaga infrastruktur mekal ai beresi, lebih agi ba kandang menua pesisir.
Iya mega ngelanggur operasyen sitak KWB enggau SWB agi bejalai baka selama taja pen pengawa ngererak dipejalai ba kededua entiti.
Berebak enggau nya, Dato Sri Julaihi madah, Sarawak begunaka RM21 bilion dikena nyapai juluk bungkur penuh bekal ai ba kandang menua tu nengah projek besai.
Ku iya, sebagi ari projek besai, iya nya projek ngaga Loji Meresi Ai Landeh, projek bekal ai Nyabau, projek bekal ai Beluru, projek beka ai Samalaju, projek bekal ai Trusan, projek bekal ai Lawas enggau mayuh agi.
"Naka tu, bungkur ai ba kandang mengeri ngelui 99 peratus tang kandang menua pesisir semina 71 peratus.
"Diatu, bungkur semua bekal ai di Sarawak dipelaba datai 85.6 peratus," ku iya nerang.
Ku iya nerang baru, Perintah Sarawak udah ngemendar kesemua belanja sepenyampau semak RM6 bilion dikena bejalaika projek bekal ai di Sarawak kenyau ari taun 2018 nyentuk diatu.
Ku iya, belanja tu bela ditambah enggau belanja sepenyampau RM1.1 bilion ungkup projek nyeleti enggau nganti paip ai lama tauka udah jai 2,740 kilometer pemanjai di selampur Sarawak ke berengkah ujung taun dulu lalu ditampung ungkup lima taun deka datai nengah chara berenggat.
Sama datai, Sapit Premier Sarawak Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri Sarawak, tuai opis perintah sereta pemesai bukai. -EDISI UKAS
