KUCHING: Kad Kredit Borneo ti dilancharka Bank Affin ulih ngenegap agi perengka guna pekara wang ba atur penerebai bilun.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kerejasama strategik Bank Affin enggau AirBorneo tu deka meri pemaik ngagai penguna, lebih agi pemegai Kad Kredit Borneo nengah ekosistem pekara wang digital enggau perengka guna pejalai langit di rantau tu.

“Tu siti perengka guna ti ulih dikena bekerejasama enggau AirBorneo laban AirBorneo deka ngerembaika servis ba menua ASEAN, lalu enti bisi kerejasama entara AirBorneo enggau Bank Affin, reti nya, penguna ulih bebeli ke tiket ngena Kad Kredit Borneo.

“Ambi ke chunto, lebuh kita deka meli tiket bilun AirBorneo, tau dibeli terus ngena Kad Kredit Borneo, amat mih bisi kad nya,” ku iya.

Iya madah munyi nya maya dirandau media pengudah bejadika Program Numbuh Bank Affin Pampang Hikmah Exchange, ditu, Hari Dua.

Nerang silik, Datuk Patinggi Abang Zohari madah inisiatif tu ukai semina ngemuntang pengawa meli tiket bilun aja, tang mega ulih narak gaya pengidup digital ba raban rayat sereta nyungkak pemansang ekonomi Sarawak enggau rantau Borneo.

Sebedau tu, AirBorneo udah madah ke niat ngerembaika rentayan penerebai sida ngagai sekeda menua Asia Tenggara, lalu Bank Affin mandangka pengeransing sida nyendiaka produk pekara wang ti muntang diakses sereta nipakka guna komuniti semak dia. -EDISI UKAS