KUCHING: Indu opis serantau Bank Affin ditumbuh ditu deka nyaup mutar pekara wang efisyen agi ungkup rayat ba kandang ngelingi nya.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, indu opis serantau ditumbuh tu deka nyadi hab nyungkak pekara wang lebuh pengawa dagang ditu badu agi ngiga palan bukai laban bisi palan ti landik ba pekara wang udah bisi di Kuching.

“Affin tu betikas antarabansa lebuh bekerejasama enggau MUFG Bank (Malaysia) Berhad, bank kelima pemadu besai di Asia, ngerandang peluang baru Pekara Wang Islam, Pekara Wang Gadung enggau Transformasyen Digital.

“Ungkup Sarawak, tu siti pintu penama ti meri peluang ngagai pengeksport, pemeranak puku enggau orang dagang kitai akses terus ngagai makit global, lalu kitai ulih besemekih ba ba rantau tu sereta antarabansa,” ku iya.

Iya madah munyi nya maya bejaku ba Program Bejadi Numbuh Bank Affin Pampang Hikmah Exchange, ditu, Hari Dua.

Nerang silik, iya madah ke tikas kredit antarabansa keterubah ari ‘Moody’s Ratings’ iya nya A3 ngayanka pengandal ti tegap ngagai bank nya lalu ngerandang jalai ungkup meri jali belanja ti meruan.

Nitih ku Datuk Patinggi Abang Zohari, ‘Borneo Card’ dilanchar serimbai pengawa numbuh pampang baru tu, mega ngangkatka Bank Affin ba penuduk ti manah agi dikena nyaup ekonomi menua enggau maya ti sama, nyungkak pemansang ekonomi dudi hari.

“Maya ti sama, ‘Borneo Card’ baru ti dilanchar tu deka mutar pekara wang ti fleksibel, promosyen ti meri pemaik ngagai komuniti, lalu ngenegap pengeransing Affin ba inklusiviti,” ku iya nerang baru.

Sama datai, Sapit Premier Sarawak Datuk Amar Profesor Dr Sim Kui Hian, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Pemangku Sekretari Perintah Sarawak Dato Sri Dr Muhammad Abdullah Zaidel, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sapit Menteri Utiliti (Sarawak Energy Berhad enggau PETROS) Dato Ibrahim Baki, Sekretari Pekara Wang Sarawak Dato Sri Dr Wan Lizozman Wan Omar, Chairman ‘Credit Guarantee Corporation Malaysia Berhad’ (CGC Malaysia) Dato Mohammed Hussein, Presiden enggau Tuai Pegawai Eksekutif CGC Malaysia Datuk Mohd Zamree Mohd Ishak, Chairman Bank Affin Dato Agil Natt sereta pemesai ke bukai. -EDISI UKAS