KUCHING: Padang Bilun Antarabansa Kuching ti baru ukai masau, tang nyadi ‘jematan’ ti nyambung Sarawak ngagai makit antarabansa.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja pan ungkus ngaga urung RM10 bilion, tang nya enda ngenggaika fakta Sarawak begunaka rentayan kaul enggi diri empu ngira kandang menua tu bepalan di pulau.
Pekara tu nyaut sekeda ke bisi betanya bekaul pemutus Sarawak ngaga padang bilun baru taja pan diatu udah ngembuan padang bilun antarabansa.
“Taja pan bisi sekeda madah, nama guna padang bilun baru? Ungkus iya engka urung RM10 bilion, tang kitai enda ulih ngenggai ke Borneo-Sarawak ba siti pulau.
“Kitai begunaka jematan, lalu jematan nya AirBorneo lalu kitai meseti ngembuan akses ngagai makit dunya,” ku iya maya bejaku ba Program Bejadi Bank Affin Pampang Hikmah Exchange, ditu, Hari Dua.
Nitih ku iya, pekara tu sigi signifikan ngenang bisi orang dagang ba raban rayat Sarawak ti ngadu eksport asil betanam betupi sida ngagai menua sepiak, baka Singapura enggau Brunei Darussalam.
“Ba ujung minggu siti tu tadi, aku udah bejadika agrofest kitai, ke alai bisi siku orang dagang indu Melayu kitai ti nyual terung Dayak nyentuk ngagai makit Brunei enggau Singapura, reti iya, iya endang ulih tan ari sukut nyual produk betanam kitai.
“Enggau Ngira pekara baka nya, dudi hari kitai endang bisi ungkup kitai,” ku iya nerang baru.
Bela datai, Sapit Premier Sarawak Datuk Amar Profesor Dr Sim Kui Hian, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Pemangku Sekretari Perintah Sarawak Dato Sri Dr Muhammad Abdullah Zaidel, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sapit Menteri Utiliti (Sarawak Energy Berhad enggau PETROS) Dato Ibrahim Baki, Sekretari Pekara Wang Sarawak Dato Sri Dr Wan Lizozman Wan Omar, Chairman ‘Credit Guarantee Corporation Malaysia Berhad’ (CGC Malaysia) Dato Mohammed Hussein, Presiden enggau Tuai Pegawai Eksekutif CGC Malaysia Datuk Mohd Zamree Mohd Ishak, Chairman Bank Affin Dato Agil Natt sereta pemesai bukai. -EDISI UKAS
