LAWAS: Palan Penyulut Teknologi Sarawak (CENTEXS) Kampus Lawas ngesan tanggungpengawa strategik ngangkat rayat di utara Sarawak enggau selatan Sabah nengah pelajar inklusif sereta muntang dilawa.
Digaga nengah ungkus RM45 juta, nganti perengka guna lama ti digaga ba taun 2018, kampus tu disikap enggau 16 bilik kelas, lapan iti buding, woksyop teknikal enggau infrastruktur latih moden sereta ulih endur 700 pelatih.
Program nya dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Hari Satu.
Bela datai Sapit Premier Sarawak, Datuk Amar Awang Tengah Ali Hasan, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail, Direktor CENTEXS enggau CENTEXS Commercial, Tan Sri Datuk Amar Mohamad Morshidi Abdul Ghani sereta temuai dipebasa bukai.
Kenyau ditumbuh, CENTEXS Lawas udah matih lebih 792 graduet nyulut nembu pelajar ba bemacham bidang teknikal, digital sereta bepelasarka pesaka.
Nyentuk sehari tu, bisi 147 nembiak regas ngerejista ba lapan program ke benung dipejalaika ke alai 22 program diatu disediaka ba baruh dua akademi, iya nya Akademi Industri & ESG sereta Akedemi Aeroangkasa, Digital enggau Kuasa Gadung.
Akademi tu berengkah dikena nengah kerejasama badan pensijilan ke diaku ba global baka Huawei, The Welding Institute (TWI), International Therapy Examination Council United Kingdom (ITEC UK) enggau Qualifi UK.
Batang tuju kerejasama nya dikena nentuka nembiak pas enggau pengelandik ke patut ti diaku ba renggat antarabansa ke bekaul enggau industri.
Semua program ari baruh akademi tu dilangkar nengah "AI Ethical Inside", nentuka transformasyen digital enggau inovasyen ditipak enggau Al ti bisi retika ungkup pemaik nembiak, industri enggau komuniti.
CENTEXS Lawas ransing ngurangka pengawa kelalu bepanggai ba pengereja kasar nengah nyikap rayat menua ngena pengelandik dikena ngerembai mansang ba sektor ke majak mansang.
Enggau pemayuh graduet ke majak nambah sereta kerejasama industri ke tegap agi, kampus tu besedia nyadi penyungkak pemansang sosio-ekonomi, jamin pemakai enggau inovasyen teknologi di selampur rantau tu.
Kampus baru tu besai amat reti dikena ngenegap penuduk Sarawak nyadi hab ungkup latih teknikal enggau vokasional, ukai semina nyendiaka servis di Lawas enggau Limbang tang mega menua sepiak, Sabah, Brunei enggau Kalimantan, Indonesia.
Kelimpah ari nya, kampus tu mega disadang deka ngadaka peluang baru ba bidang hotel agropemakai, dagang temuai, minyak & gas sereta industri gadung.-EDISI UKAS
