LAWAS: Palan Penyulut Teknologi Sarawak (CENTEXS) Lawas, nyadi sebagi ari inisiatif besai ngerumban pemansang pengelandik, lalu ngenegap struktur ekonomi di kandang menua utara Sarawak.

Sapit Premier Sarawak, Datuk Amar Awang Tengah Ali Hasan madah, Palan nya ditumbuh dikena nyikap rayat, lebih agi raban nembiak, ba napi pemar global ti majak pedis ditambah inovasyen enggau teknologi.

“Tu perais ke besai endar ungkup kitai di Sarawak lebih agi ba kandang pemadu utara di Sarawak iya nya Limbang enggau Lawas.

"CENTEXS deka meri peluang ngagai rayat kitai, lebih agi ba raban rebak biak, bulih penemu, nambahka pengelandik sereta pengulih," ku iya.

Iya bejaku munyi nya maya Program Bejadi CENTEXS Lawas ke udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Satu.

Bela datai, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail, Direktor CENTEXS enggau CENTEXS Commercial, Tan Sri Datuk Amar Mohamad Morshidi Abdul Ghani sereta temuai dipebasa bukai.

Datuk Amar Awang Tengah madah baru, graduet CENTEXS Lawas ti ulih tetangkup makit kereja ngemantupka ati lebuh udah ngerikod 98 peratus kenyau palan nya ditumbuh ba taun 2018.

"Bisi ti udah dipinta gawa taja pan bedau abis belajar.

"Indah bisi ke bulih gaji manggai RM10,000 sebulan," ku iya madah baru. - EDISI UKAS