LAWAS: Palan Penyulut Teknologi Sarawak (CENTEXS) Lawas diangkat nyadi Palan Latih Serantau dikena nempa pengereja landik enggau ulih besemekih.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Perintah Sarawak deka meri belanja dikena ngemanah infrastruktur palan nya.
“Aku ti nyadi Chairman Yayasan Sarawak, kitai setuju ke CENTEXS Lawas nyadi Palan Latih Serantau.
"Tu ketegal kitai mayuh pangan sepiak kitai, iya nya, Brunei, Sabah enggau mega engka ba luar Lawas alai kitai deka meri latih strategik ngagai raban nembiak ditu.
"Ukai semina ungkup orang Lawas aja tang palan nya ‘universal’," ku iya.
Iya madah munyi nya maya bejadika CENTEXS Lawas ditu, Hari Satu.
Bela datai, Sapit Premier Sarawak, Datuk Amar Awang Tengah Ali Hasan, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail, Direktor CENTEXS enggau CENTEXS Commercial, Tan Sri Datuk Amar Mohamad Morshidi Abdul Ghani sereta temuai dipebasa bukai.
Dulu ari nya, Datuk Amar Awang Tengah minta belanja diberi ngagai CENTEXS Lawas dikena ngemanah infrastruktur lalu dipasuk ba Pelin Pemansang Malaysia Lumpar Ke-13 (RMK-13).
Datuk Patinggi Abang Zohari madah, palan latih besai reti ba ngemansangka pengereja landik nyengkaum ba sektor bumai ti bekenaka teknologi moden dikena nentuka bekal pemakai chukup.
“Lawas enggau Limbang meseti bekenaka chara moden. Nya alai kitai nyendiaka latih, kitai matih orang ditu, bakani bekenaka jentera dikena bumai. Enti ulih kitai bumai dalam setaun dua kali. Kelimpah ke kena diri, laluh beras tau dijual kitai," ku iya nerang.
Ngenang pekara bukai, Premier Sarawak nyemetak madah nengeri tu majak nyingkang ke mua enggau juluk pemansang akademik ti ngemerat pemansang penau, pemeruan rampa menua sereta transformasyen ekonomi bepelasarka teknologi, nyengkaum pengawa bekenaka hidrogen enggau Artificial Intelligence (AI).
“Siti menua di Eropah ti nyulut sereta dikemegah menua bukai di Eropah iya nya menua Jerman ketegal pelajar latih diberi ngagai rayat sida.
"Lalu kedua rakyat menua nya ulih nyikap diri enggau chara baru ba ekonomi iya. Jerman baka Malaysia iya nya konstitusyen. Siti kandang menua di Jerman ke mansang endar iya nya Bavaria. Nyadi kitai di Sarawak meseti ngembuan pelin polisi ti ulih mai Sarawak baka Bavaria mai Jerman lalu kitai Sarawak mai Malaysia," ku iya.
Ba program sama, Premier Sarawak bela bejadika Green Asphalt Testbed sereta ngemata pengawa betukar sempekat pemereti ati (MoU) entara CENTEXS enggau Sarawak Media Group.-EDISI UKAS
