MATU: Program Pengerai Komuniti Renggat Kampung Bawang serimbai Bulan Kebangsaan 2025 nyadi palan besai ba nambah pengeleda rayat bekaul pemesai reti nyaga pengerai, kelimpah ngenegap semangat beserakup enggau segulai komuniti menua.

Sapit Menteri ba Opis Premier Sarawak (Integriti & Ombudsman) ke mega Kaban Kunsil Nengeri (ADUN) Jemoreng, Dato’ Murshid Diraja Dr Juanda Jaya madah, kaul regas rayat ba program nya ngelai semangat merdeka enda semina dikenataika nengah nuatka ’Jalur Gemilang’ tang mega diayanka nengah pengeransing ngintu pengelantang diri sereta diri sebilik.

“Program tu endang signifikan laban iya mai penerang dikena nyungkak pengeleda bekaul pengerai, tumu nemu penyakit raya sereta meri pelajar senentang ngatur ubat ti betul dikena nentuka ubat nya likun sereta berejista,”ku iya maya bejadi program nya di Dewan Muhibbah Haji Mahdi, Kampung Bawang, kena Hari Minggu tu tadi.

Nitih ku iya, program nya mega nyadi pelasar nabur penerang bekaul mySalam ke ngintu pengerai rayat, meransang meri darah nyadi ulah ti manah dikena nyelamatka nyawa sereta madahka tanggungpengawa agensi pengelikun baka Raban Penyangga Orang Periman Malaysia (APM), sereta macham servis ke disediaka sida.

“Program baka tu ulih ngenegap semangat besaup enggau kerejasama ba raban peranak genturung, kelimpah nempa Dewan Muhibbah Haji Mahdi nyadi kelai penyerakup komuniti enggau palan aktiviti beguna ungkup semua,” ku iya madah baru.

Sama datai, Pegawai Pelilih Matu Hamidah Halpi, Pegawai Perubat Dr. Nur Fadzilla Junaidi, Pegawai Penyangga Orang Periman Matu Lt. (PA) Jumaat Akasas, Pegawai Farmasi Hospital Daro Saalini Mahalingam, Pemancha Pelilih Matu Mesalch @ Che Jeni Shahdan sereta Penghulu Kampung Bawang/Sekan Kechil Norlela Deris.-EDISI UKAS