KUCHING: Latih bantu enseput (CPR) sereta ngena kereban Automated External Defibrillator (AED) majak beguna laban kes penyakit tungkul atau majak nambah, nyengkaum pengerai runding ba komuniti moden.

Sapit Premier Sarawak, Datuk Amar Prof Dr. Sim Kui Hian, nyemetak madah ke pengeleda enggau pelajar bekaul CPR sereta bekenaka AED beguna endar laban ulih ngidupka nyawa ba penusah raya.

“Pengelantang runding besai amat reti lalu deka nyadi majak signifikan seriris enggau peneras gaya pengidup maya hari tu. Ba arus pemansang, mayuh enda nemu sapa ke ulih enggau bejaku. Ketegal nya, sida majak berasai sunyi lalu kediri laban nadai alai sida bekunsi penusah diri,”ku iya.

Iya ti mega Menteri Pengerai Mensia Mayuh, Pengawa Berumah enggau Perintah Lokal madah munyi nya maya bejadika Program Latih Pengerai Runding Enggau Pengelandik Ngidupka Nyawa Ngena Rambai Jaku “Mind, Heart & Hands: Empowering Wellness, Saving Lives” ditu, kena Hari Minggu tu tadi.

Program ti ngempuru lebih 120 penyereta nya nyelinting pengeleda ba pengerai runding nengah licha khas, kelimpah latih intensif CPR enggau bekenaka AED ti diembing jurulatih ari Bulan Sabit Merah Malaysia.

Lebuh bejaku, iya mega madah ke pengelantang holistik ngaul pengerai runding enggau batang tubuh, kelimpah muji pengeransing raban voluntia nembiak ti siru gawa ke komuniti enggau sedia mantu maya tusah.

“Mayuh pekara besai ti ngaul runding enggau ati, nya alai kededua iya patut dikemerat. Ke besai reti agi, kitai begempuru ditu laban pengasih sereta penyayau ngagai Sarawak. Nya mih ketegal kita semua ditu sehari tu, lalu tu mega sebagi ari pengeransing nempa menua bansa Sarawak,”ku iya nerang.

Program nya diperati nyadi pelasar besai nyikap raban nembiak Sarawak ngena penemu enggau pengelandik praktikal ti meri empas positif ba pengelantang komuniti.-EDISI UKAS