KAPIT: Pengerami ngintu Hari Bujang Berani Renggat Bagi Menua Kapit 2025 ke diatur di Tugu Bujang Berani, Waterfront Baru Kapit nyadi awak ngenang jasa sereta pemerani bujang berani ti udah berambun nyawa ungkup pengelantang menua, kena Hari Minggu tu tadi.

Program ti diatur Gerempung Veteran Soldadu Malaysia (PVATM) Pampang Kapit nya ngempuru urung 250 penyereta nyengkaum 180 veteran Raban Soldadu Malaysia (ATM) enggau Polis DiRaja Malaysia (PDRM) ari selampur Sarawak.

Program ke besai amat reti nya dipenyadi Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat.

Bela datai, Pegawai Tugas Khas Opis Menteri Pengeraja Asal enggau Pemansang Mengeri, Leftenan Jeneral (B) Datuk Stephen Mundaw, Residen Bagi Menua Kapit Tuan Elvis Didit, kelimpah tuai genturung pendiau, balu enggau veteran sebilik.

Ba jaku iya, Datuk Jefferson nyemetak madah Hari Bujang Berani ukai semina program ninting taun, tang siti pelasar besai dikena nerenak semangat patriotisme ba rayat, lebih agi rebak baru.

“Pengelantang enggau pemansang ke diasai sehari tu engka enda dijapai enti nadai bujang berani berambun nyawa ngetan menua.

“Kitai patut bebasa ke jasa sida nengah nerenak nilai patriotik ba dalam diri tiap raban Malaysia,” ku iya.

Iya bela ngenang pemerani PW II Lenggu China ari Kapit ti udah midang di Batu Babi, Song, lebuh iya belaban enggau komunis nyadi chunto bujang berani ti patut dikenang.

Nyadi kelai masa jasa veteran, Datuk Jefferson ngungkup RM30,000 nengah Projek Mit Menua Pesisir (MRP) dikena nyaup atur sereta nyeruri Wisma Veteran PVATM Pampang Kapit.

Program nya tembu pengudah pengawa begambar begulai enggau bala veteran ATM, PDRM, balu sereta bujang berani sebilik nyadi kelai masa jasa sida ngagai menua.

Pengerami ngintu Hari Bujang Berani tu ukai semina dikena ngenang Sejarah sida ke berambun nyawa ngetan menua, tang nyadi pun semangat patriotisme ke majak tumbuh regas ba ati rayat Malaysia. — EDISI UKAS