KUCHING: Perintah Sarawak benung ngelangkar polisi baru ti komprehensif agi dikena mutar isu pengerai runding, gian digital sereta pemar rama ba rayat moden.

Pekara tu disebut Sapit Premier Sarawak, Datuk Amar Prof. Dr. Sim Kui Hian berindik ari kes tusut runding ke majak mayuh ti ngirau ke ati ketegal gaya pengidup maya hari tu.

”Pengerai Runding sigi pedis diperagam, sema jaku, semua orang ba dunya bisi tusut runding, tang ti mida sida nya, baka ni kitai napi sereta mutar.”

”Ari peneras ubah jeman digital, pengawa bekenaka ’smart phone’, sukung ke majak kurang nyentuk bisi diri sebilik enda entu bejaku enggau pangan diri,” ku iya nerang.

Kelimpah ari nya, isu pengerai runding diatu ngelui ari pekara perubat, lalu patut diputar semua agensi ke bekaul mungkur polisi rama, pelajar enggau saup komuniti.

“Pengerai runding ukai semina isu perubat. Sebaka pelajar, nya ukai semina pasal belajar aja, nya siti langkar transformasyen ekonomi. Baka nya mega pengerai runding, iya ukai semina bekaul pengerai, tang mega isu rama enggau gian.”

Iya nyemetak madah ke semua ke bekaul patut besaup ngelangkar polisi enggau intervensyen ti engkeman, nyengkaum mutar isu baka bejudi ’online’, salah guna media rama enggau gian digital.

“Semua ke bisi kuasa patut duduk semija berandauka baka ni deka mutar, intervensyen ti patut dipejalai sereta polisi ti engkeman diletak. Pekara tu patut dipejalaika bemacham agensi.”

Dr. Sim nyemetak madah, pemesai reti pengeleda enggau sukung psikologi ba mutar isu tu laban tiap iku mensia patut bisi chara kediri mutar isu pengerai runding lalu nadai siti chara ti engkeman ungkup semua.

Inisiatif tu disadang deka dirandau begulai enggau Premier Sarawak, Datuk Patinggi Tan Sri Abang Abdul Rahman Zohari Tun Abang Openg sereta raban pemesai nengeri enda lama agi, nyadi singkang tumu nempa polisi pengerai runding ti holisitk agi sereta besepadu.-EDISI UKAS