KAPIT: Pemansang pelajar enggau negap penyerakup raban bansa terus dikemerat perintah nengeri lebuh Balai Mayuhguna Sekula Primari (SK) Kapit dipenyadi ba siti pengawa ti diumba enggau Pengerami Makai Lemai Serakup Apai Indai enggau Pengajar (PIBG) kena Hari Enam.
 
Kaban Kunsil Nengeri (ADUN) Bukit Goram, Datuk Jefferson Jamit Unyat ti bejadi pengawa madah, balai nya ukai semina meri pemaik ngagai raban sekula aja, tang nalan mayuh guna ungkup komuniti ngatur bemacham aktiviti.
 
“Perengkaguna tu ukai semina dikena raban sekula ngatur bemacham program pelajar, main asal, main enggau jalai pengarap aja, tang meri pemaik ngagai komuniti ditu,” terang iya.
 
Iya mega madah ke pemesai guna nembiak diajar tumu ba bidang Sains, Teknologi, Injiniring enggau Matematik (STEM) nentuka rebak biak Kapit sedia besemekih ba tikas global.
 
Kelimpah ari nya, iya ngansah pengawa munas ulah beduan ba sekula meseti ditegap begulai ungkup nyamin rampa belajar ti lantang enggau likun.
 
Lebuh bejaku, Datuk Jefferson mega ngemendarka RM30,000 ari Projek Mit Pemansang Menua Pesisir (MRP) ungkup PIBG ngatur aktiviti sekula.
 
Pengawa nya digulu lebih 250 temuai bela richah beperindang enggau bala pengajar belagu sereta bala nembiak SK Kapit ngajat.
 
Sama datai, Sapit Residen Bagi Menua Kapit, Robert Liman Deli, Pegawai Pelilih Kapit, Cerisologo Sabut, Kepala Pengajar SK Kapit, John Rimbar enggau Yang Dipertua PIBG SK Kapit, Merdeka Sangai.-EDISI UKAS