SRI AMAN: Opis Menteri Nembiak, Lumba enggau Pemansang Orang Dagang Sarawak (MYSED) nyukung tegut pengawa ngatur pekit tinju ba nengeri tu nyadi pelasar mantai enggau ngansah penau biak ba main nya.
 
Sekretari Mendam MYSED, Morshidi Fredrick madah, pekit baka nya ukai semina ulih meri peransang ngagai petinju biak aja, tang nyadi kelang sida mantaika penau ke tikas tinggi agi.
 
“Ba opis menteri, kitai endang nerima manah pekit baka tu diatur enggau suah agi ngambi ulih mantai enggau ngansah penau petinju biak.
 
“Agensi baka Kaunsil Lumba Sarawak (SSC) enggau Kaunsil Lumba Negeri Sarawak seruran ngiga penau baru ngambi disabung ngari ke nengeri ba pekit besai,” ku iya.
 
Iya nibar ke jaku nya lebuh bejaku ngari ke Menteri MYSED, Dato Sri Abdul Karim Rahman Hamzah ba pengawa nutup Pekit Tinju Besai Sarawak Edisyen Ke-4, ti diatur ba Stadium Tertutup Sri Aman, kena Hari Enam.
 
Ku iya, entara pekara diperati nentuka Sarawak bisi bala petinju pemadu manah ngari ke nengeri tu ba pekit Lumba Malaysia (SUKMA) di Selangor taun baru.
 
Kelimpah ari nya, iya nyemetak madah ke pengawa ngatur pekit tinju ba tikas Sarawak mega setipak enggau pengawa Sarawak besikap nyadi tuai rumah begulai Lumba SEA 2027.
 
“Pekit baka tu tentu mega meri inspirasyen enggau nyadi sebagi ari pengawa kitai besikap nempa atlit bisi kualiti ngari ke Sarawak, udah nya Malaysia ba kelang antarabansa,” ku iya nyemetak.
 
Ba pekit nya, bisi 123 petinju udah nurun ke kelang nyengkaum ari Semenanjung Malaysia, Indonesia enggau Singapura.
 
Sama datai, Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Simanggang Datuk Francis Harden Hollis, ADUN Lingga Dayang Noorazah Awang Sohor, Presiden Serakup Tinju Sarawak (SABA) Dato Rahman Lariwoo, Residen Bagi Menua Sri Aman Mahra Salleh sereta temuai dipebasa bukai. -EDISI UKAS