SRI AMAN: Perambu numbuhka Palan Tinju Nengeri Sarawak di Sri Aman udah dibantai ngagai Opis Menteri Nembiak, Lumba enggau Pemansang Orang Dagang Sarawak (MYSED) ngambi diperunding.
 
Sapit Menteri Pelajar, Inovasyen enggau Pemansang Penau ti mega Kaban Kunsil Nengeri  (ADUN) Simanggang, Datuk Francis Harden Hollis madah, raban sida merambu palan tinju nya ditumbuh ba taba pemesai lima ikar sepiak Stadium Tertutup Sri Aman.
 
Ku iya, pengudah tembu ila, palan latih tinju nya deka disikap buding lelaki enggau indu, balai makai enggau fasiliti bukai.
 
"Palan latih tinju tu, keretas kereja disedia enggau ungkus urung RM20 juta. Nya alai, kitai agi nganti pemendar.
 
“Aku pechaya ari sukung tegut Presiden Serakup Tinju Nengeri Sarawak (SABA) ila, palan latih tinju di Sri Aman deka dikemendar enggau digaga jampat.
 
“Laban kitai deka ngena palan tinju tu matih bala petinju tin gari ke Sarawak ba tikas SUKMA ila,” ku iya.
 
Iya bejaku munyi nya lebuh dirandau media ba malam kepenudi Pekit Tinju Besai Sarawak 2025 Edisyen Ke-4 ba Stadium Tertutup Sri Aman kena Hari Enam.
 
Iya mega ngarap ke palan tinju nya ulih tembu sebedau Lumba SEA 2027 belabuh ngambi bala atlit ti ngari ke Sarawak ba pekit nya ulih belatih dia.
 
Ngenang ungkus projek nya, Datuk Francis Harden madah ke raban sida deka nganjung peminta ngagai MYSED ngambi dikemendar.
 
Seraya Presiden SABA, Dato Rahman Lariwoo madah, pengawa milih Sri Aman nyadi Palan Latih Tinju Nengeri Sarawak endang patut endar ngira gaya geografi menua nya.
 
"Kitai bisi 14 palan latih ari Limbang ngagai Kuching.
 
“Bala pelatih ari bagi menua bukai baka ari Miri, Limbang, Kanowit, Kapit, Sibu enggau Bintulu, sida lantang ngelawa Sri Aman.
 
"Sri Aman mega udah nempa mayuh petinju ti nyulut ungkup nengeri Sarawak,” ku iya.
 
Ungkup penerang, bisi 123 petinju nurun bepekit ba edisyen sekali tu nyengkaum ari Semenanjung Malaysia, Indonesia enggau Singapura. - EDISI UKAS