BALINGIAN: Opis Pengintu Pengelantang Mensia Mayuh Sarawak (JKMS) deka ngerembaika program Outreach Santuni Komuniti (POSKOM) ke selampur Sarawak.
 
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah POSKOM nyadi chara JKMS bejalai ngusung ngambi meri awak ngagai rayat ngulihka penerang, mantai sebana enggau akses servis ngintu pengelantang ti muntang agi.
 
Ku iya, inisiatif nya seriris enggau Strategi Pemansang Pengudah COVID-19 (PCDS) 2030.
 
Iya bejaku munyi nya lebuh bejadika POSKOM) Renggat Bagi Menua Mukah sereta Ngelanchar Logo Rasmi POSKOM Sarawak b Balai Komuniti Balingian kena Hari Enam.
 
Iya nerang, POSKOM Mukah nyendiaka bemacham servis nyengkaum peminta Kad OKU, Kenyalang Gold Card (KGC), Senior Citizen Health Benefit (SCHB), beperesa pengerai pechuma, servis sanding penemu pasal bantu pengelantang enggau pemandang agensi.
 
Naka diatu, lapan siri POSKOM udah diatur ba selampur Sarawak enggau nerima lebih 6,000 penyereta, ti mandangka perintah naka ulih nentuka nadai raban dikelaung ari sistem bantu sosial ti disedia.
 
Seraya Kaban Kunsil Nengeri (ADUN) Balingian Abdul Yakub Arbi ti sama datai meri terima kasih ngagai JKMS ti udah ngatur program nya.
 
Sama datai, Sekretari Mendam Opis Menteri Pemansang Indu, Nembiak Mit enggau Pengelantang Komuniti Sarawak Datu Felicia Tan Ya Hua, Residen Bagi Menua Mukah Datu Kueh Lei Poh enggau Direktor JKMS Semawi Mohamad.-EDISI UKAS