BINTULU: CRAUN Research Sdn. Bhd. nurai sejarah kediri lebuh ngelancharka FERTARA, sum sebatian sebela ti digaga ngena formulasyen khas dikena nyukung pun mulung tumbuh (Metroxylon mulung).
Pengawa nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg serimbai Sarawak Agrofest 2025 ti diatur ba Padang Bilun Lama ditu, kena Hari Enam.
Ku penerang CRAUN, FERTARA nya asil semua pansik pengelama 20 taun (2003–2023) ti betuai ke Tuai Pemansik Kanan, Fariza Zaini begulai enggau Peter Stanley Howell, sereta nerima sukung tumu ari pakar agronomi tebilang, Prof. Zaharah Abdul Rahman ari Universiti Putra Malaysaia (UPM) enggau Tayeb Dolmat Kaunsil Minyak Sawit Malaysia (MPOB).
CRAUN madah, asil pansik mandangka FERTARA ngasuh batang jampat tumbuh dibanding sum sebatian bukai ti bisi ba makit diatu.
“Tungkap besai udah dipejalai ba ladang mulung diempu Kaunsil Pemansang enggau Ngintu Tanah (PELITA) ba Mukah, Stesyen Pansik Sungai Talau di Dalat sereta kebun mulung diempu pekebun mit.
“Projek tu dipelanja Perintah Sarawak nyadi sebagi ari pengawa nambahka produktiviti enggau kualiti asil mulung ti nyadi pesaka enggau pemansut ekonomi besai ngagai Sarawak,” ku penerang nya.
CRAUN madah, formulasyen FERTARA udah difail ngambi ngelindung paten enggau Kaunsil Reta Intelek Malaysia (MyIPO).
“Pemujur dijapai tu mandangka baka ni Pansik enggau Pemansang (R&D) timpuh panjai CRAUN udah nyengala dipeda ba produk ti dipaten enggau dikomersial, setipak enggau visyen Strategi Pemansang Pengudah COVID-19 (PCDS) 2030 ti ngena data enggau inovasyen dikena nyungkak ekonomi tumbuh,” ku iya.
Sum nya deka dikilang Sarawak Fertilizer Sdn. Bhd., siti kompeni lokal ti mayuh peneleba ngeluarka sum bisi kualiti tinggi.
Produk nya deka dijual ngagai pekebun mit mulung, agensi pemansang sereta pemekuh industri mulung ba selampur nengeri.
Berebak enggau nya, bela diatur siti kelai pengawa nyua sum FERTARA ari raban CRAUN ngagai Kaunsoil Pemansang Mulung enggau Apong Sarawak (SNDB).
Pengawa nya udah dipenyadika Sapit Sekretari Mendam Opis Menteri Pelajar, Inovasyen enggau Pemansang Penau Sarawak (MEITD), Anielia Siam ngari ke CRAUN, seraya SNDB diari ke Menijar Besai, Zaidell Hussaini.
Pengawa nyua sum FERTARA nya mandangka kerejasama strategik CRAUN–SNDB negapka pekebun mit enggau pemekuh industri mulung.-EDISI UKAS
GAMBAR FACEBOOK CRAUN Research Sdn. Bhd.
