KAPIT: Program Jum REGISTA Bisnes diatur Opis Menteri Dagang Antarabansa, Industri enggau Meranak Puku (MINTRED) Sarawak enggau kerejasama SEDC, Opis Residen enggau Opis Pelilih Kapit mujur matak lebih 300 penyereta.
 
Program diatur ba Dewan Suarah Kapit kena Hari Enam nya udah dipenyadika Sapit Menteri ba Opis Premier Sarawak (Undang-Undang enggau Adat Bumiputera) ti nyadi Kaban Kunsil Nengeri (ADUN) Bukit Goram, Datuk Jefferson Jamit Unyat.
 
Lebuh bejaku, iya madah ke pengawa rejista dagang nya pengawa besai nentuka orang dagang ulih besemekih.
 
Ku iya, kenyau ari dipejalai, program Jum REGISTA udah mantu 5,667 orang dagang selampur Sarawak, nyengkaum 388 orang dagang baru ari Kapit ba edisyen dulu ari nya.
 
Kelimpah rejista dagang, bala penyereta mega diberi penerang senentang pengawa ngatur enggau bantu belanja ari agensi enggau institusyen pengawa dagang.
 
Ku Datuk Jefferson, perintah nengeri nengah MINTRED mega nyendiaka bemacham inisiatif ngagai Dagang Mikro, Mit enggau Jelan Pemesai (PMKS) nyengkaum Program Graduet Nuju Nyadi Orang Dagang (GERAK), Orang Dagang Teknikal & Vokasional (USTEV), Program Go Digital, Skim Kredit Mikro Sarawak (SKMS), Skim Jali Industri Mit enggau Jelan Pemesai (SPIKS) sereta program pemansang kapasiti enggau promosyen.
 
Naka suku kedua 2025, sepenyampau 41,800 PMKS ba selampur Sarawak udah nerima pemaik penyampau RM204 juta, seraya 254 orang dagang ba Kapit nerima bantu manggai RM4.2 juta.
 
Kapit mega ampit ngasai ke buah pemansang infrastruktur lebuh MINTRED ngaga tembu Taman Perindustrian Kapit pemesai 19 hektar ungkup bisi dikena PKS lokal kelimpah merambu Anjung Usahawan Song.
 
“Perintah Sarawak seruran ransing mantu orang dagang nambahka pengelandik, produk sereta servis ngambi ulih besemekih nyentuk tikas global,” ku iya.
 
Pengawa sehari nya mega richah enggau pejalai Datuk Jefferson ngelawa palan pemandang orang dagang ti diatu sepiak balai.
 
Pengawa sehari nya diatur lanchar enggau nyapai tuju negapka orang dagang lokal.-EDISI UKAS