BINTULU: Perintah Sarawak terus negapka agenda jamin bekal pemakai nengeri ari ngena teknologi moden ba sektor betanam enggau betupi, nyengkaum nengah kerejasama strategik begulai enggau Brazil.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Brazil udah nyadi entara pengeluar pemakai pemadu besai dunya ari ngemeran teknologi moden besai, lalu Sarawak patut bechuntoka pemujur tu ngambi ulih bediri sama peninggi ba tikas global.
 
“Aku madah, lawa Brazil ambi teknologi sida. Teknologi nya ambi lalu kitai bekerejasama ari sukut teknologi ari Brazil.
 
“Brazil endang siti menua tebilang ari sukut pemakai ba Amerika Selatan.
 
“Enti Brazil mujur, Denmark bisi Nestlé, teju Sarawak bisi penuduk ba panggau dunya dalam industri pemakai,” ku iya lebuh bejaku bejadika Sarawak Agrofest Festival ba Padang Bilun Lama Bintulu, kena Hari Enam.
 
Seraya Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, Brazil udah dikelala nyadi bakih strategik endur belajar ke chara betupi moden, lebih agi teknologi inseminasi digaga dikena nambahka purih chapi Zebu di Sarawak.
 
“Sida bisi lebih 240 juta iku chapi, chukup mayuh enti dibanding kapasiti kitai.
 
“Nya alai kitai deka ngena frozen sperm lalu mai teknologi artificial insemination ngambi ulih nambahka purih chapi ba Sarawak.
 
“Menteri Betanam Betupi Brazil mega udah setuju bala pegawai kitai dianjung kin ngambi ngulu latih enggau belajar,” ku iya.
 
Iya mega madah, purih chapi Zebu ti datai ari India diatu mayuh agi ditupi ba Brazil dibanding menua asal jelu nya, mandangka adaptasyen teknologi ulih meri pemujur ti besai agi.
 
Dato Sri Dr Stephen mega madah ke pengawa nya sebagi ari strategi Sarawak nambahka Tikas Belanja Idup (SSL) pemakai nengeri sereta badu agi kelalu bepanggai ba import.-EDISI UKAS