BINTULU: Sarawak deka ngerembaika servis kompeni bilun AirBorneo ngena bilun ATR ti diubah nyadi bilun kargo ungkup eksport asil betanam betupi ke makit lur bepun ba Singapura.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nya setipak enggau pengawa perintah nengeri negapka sektor betanam betupi ari sukung logistik moden.
 
“Perintah Sarawak nengah AirBorneo deka nyendiaka bilun ATR ti diubah nyadi kargo ngambi ulih mai asil betanam betupi ke makit luar, lebih agi Singapura,” ku iya.
 
Iya nyebut jaku nya lebuh bejadika Sarawak Agrofest 2025 ba Padang Bilun Lama Bintulu kena Hari Enam.
 
Premier Sarawak madah baru, perintah nengeri udah ngelala sitak Tanjung Manis nyadi hab ngeluar besai, ungkup nanas, sebedau dieksport ke Singapura.
 
“Sitak Tanjung Manis deka nyadi palan ngeluar, lalu produk baka nanas deka dieksport ke Singapura ti udah nya nyadi palan ngagih,” terang iya.
 
Premier Sarawak nyemetak madah ke inisiatif nya nipakka juluk perintah nengeri nyagu Sarawak nyadi pemekuh besai ba industri pemakai serantau.
 
“Enti menua baka Brazil enggau Denmark mujur dalam industri pemakai sida, Sarawak mega patut ngangkatka diri ba panggau dunya ba pengawa tu,” ku iya nyemetak.
 
Iya mega madah, pengawa nya ukai semina negapka sektor betanam betupi aja, tang mega ngerandang peluang penatai pemisi baru ngagai rayat nengah makit eksport ti sedandang agi.- EDISI UKAS