BINTULU: Duli Yang Maha Mulia Sultan Selangor, Sultan Sharafuddin Idris Shah Al-Haj setuju ke perambu Universiti Putra Malaysia (UPM) Kampus Bintulu numbuhka kus bekaul bidang veterinar pemadu besai ba Malaysia.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nya beguna endar dikena nempa mayuh agi graduet bidang lutur jelu ba nengeri tu.
 
“Endang amat, Sultan Selangor setuju lebuh sesyen randau nya ke alai Sarawak bisi pengulih besai ba pengawa betanam enggau betupi.
 
“Nya kebuah, Baginda setuju sekula khas ditumbuh ba Bintulu, ti pemadu besai ba Malaysia,” ku iya.
 
Iya nyebut jaku nya lebuh bejadika Sarawak Agrofest 2025 ba Padang Bilun Lama Bintulu kena Hari Enam.
 
Kelimpah ari nya, Premier Sarawak mega ngelancharka logo “Sarawak Veterinary Registered” enggau nyua sekeda anugerah baka Orang Dagang Mujur Utai Tanam Pemakai, Orang Dagang Mujur Industri Bekebun, Orang Dagang Mujur Nupi Ikan Darat, Anugerah Gerempung Orang Bumai Sitak Mujur, Anugerah Betupi Mujur enggau Ikon Agropreneur Sarawak.
 
Sama datai, Sapit Premier Sarawak, Datuk Amar Professor Dr Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nasar, Menteri Dagang Temuai, Seni enggau Budaya, Dato Sri Tiong King Sing, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, bala Menteri enggau Sapit Menteri, bala tuai opis enggau temuai dipebasa bukai. -EDISI UKAS