BINTULU: Perintah Sarawak deka ngaga undang-undang baru ujung taun tu dikena ngadu pengawa ngatur teda sawit ba tanah Adat Bansa Asal (NCR).
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nya beguna endar laban asil bukai sawit baka palm kernel bisi nilai ekonomi tinggi, baka tau nyadi sum, pemakai jelu enggau biogas.
 
Tang ku iya, diatu teda sawit nya dijual ngachir enggau nadai diatur manah ngujungka pengulih kebendar tebasau ngapa.
 
“Enti tanah NCR endur nanam sawit, asil bukai baka kernel tau nyadi pemakai jelu.
 
“Tang penanggul diatu, nadai  undang-undang dikena ngatur teda tu lalu bisi ti nyual nadai berurun.
 
“Kitai begunaka undang-undang ti ulih nentuka semua teda sawit tu digumpul.
 
“Ari chara tu, teda ulih nyadi sum, pemakai jelu enggau mega biogas,” ku iya ba Aum Media pengudah bejadika Sarawak Agrofest 2025 ditu, Hari Enam.
 
Iya mega madah ke Opis Luyar Menua diatu benung ngadu langkar undang-undang nya lalu dipelaba dipadah ujung taun tu.
 
“Insya-Allah, ujung taun tu Luyar Menua benung ngadu langkar undang-undang khas ungkup pengawa tu,” ku iya.
 
Nya alai Datuk Patinggi Tan Sri Abang Zohari andal ke undang-undang baru dipejalai nya ila deka negapka agenda jamin bekal pemakai Sarawak, nyukung pemansang industri jelu tupi moden, kelimpah nambah penatai pemisi komuniti menua pesisir ngena chara ekonomi bepusin.-EDISI UKAS