KOTA SAMARAHAN: Universiti Teknologi MARA (UiTM) Sarawak Kampus Samarahan negapka pangku pengawa nyadi jematan global ti ngempung nembiak enggau staf akademik ari mayuh menua nengah pelajar, budaya enggau kaul bebakih.
Rektor UiTM Pampang Sarawak, Profesor Dr Firdaus Abdullah madah ke program nya ngelui ari agenda akademik aja.
“Come Discover Bumi Kenyalang 2025 (CDBK2025) ukai semina program mobiliti aja, tang mega siti jematan kaul ti nyambung kitai neresa adan budaya.
“Sekumbang seminggu, bala penyereta udah pansut ari zon lantang, ngasai empu pengelain enggau nemu pengering baru ba sida empu,” ku iya bejaku ba mua mayuh rambau pengawa nutup CDBK2025, ditu, Hari Lima.
Edisyen ketiga CDBK mujur ngempuruka 40 penyereta antarabansa ari Kemboja, China enggau Indonesia, ngaul nembiak enggau staf ari National University of Management, Guangxi Minzu Normal University, Quanzhou Technical & Vocational University enggau Universitas Panca Bhakti (UPB), Pontianak.
Profesor Dr Firdaus mega nyemetak madah ke UiTM Sarawak ransing ngerembaika rentayan kaul global nengah bemacham MoU enggau MoA enggau universiti antarabansa.
“Semua pengawa tu dikena nentuka rebak kitai ulih bediri sama peninggi enggau bakih antarabansa. Peneleba ti ulih enda disukat ngena gred tauka setipikit, tang ari tuchum, penemu berega enggau pengandal ngagai diri ti bisi ati sida,” ku iya.
Sekumbang program nya, bala penyereta ngasai peneleba nyelai ari budaya Sarawak nyengkaum Jom Klaka Jaku Sarawak, ngaga kek lapis, main lama, pengawa luar, penemuai budaya enggau pemerindang tanda etnik, ngasuh CDBK25 nyadi nalan kebendar mereti ke pengelantang pupu bansa ba Tanah Kenyalang.
Sebedau bejadi nutup program, iya meransang bala penyereta nyadi Duta Mit Sarawak ba menua sida empu enggau bekunsi peneleba sereta kaul bebakih ti ditanggam.
Sama datai, Penulung Mandal Canselor (Antarabansa) UiTM Global Profesor Madya Datin Dr Norazida Mohamed, Direktor Unit Penuduk UiTM Global Profesor Madya Ts Dr Rosdiana Hasham, Direktor Kaul Kunsi Strategik UiTM Global Profesor Madya Dr Wan Fairos Wan Yaacob, Mandal Rektor MT Kerjasama Universitas Panca Bakhti (UPB) Ir Arif Parabi, Direktor Jamin Kualiti UPB Profesor Dr Ir Rahmatullah Rizieq enggau Koordinator UiTM Global Sarawak Dr Wan Juliana Emeigh Wahed. -EDISI UKAS
