BINTULU: Program Ngaul Komuniti Betanam Betupi (AgriCOP) terus nemban nyadi penyungkak transformasyen sektor betanam betupi menua pesisir lebuh 250 penyereta ari 12 rumah panjai ngulu program nya ti tembu diatur ba Rumah Tabor Lasah, Sungai Sera, Sebauh.
Menteri Industri Pemakai, Komoditi enggau Pemansang Kandang Menua Sarawak (M-FICORD), Dato Sri Dr. Stephen Rundi Utom madah, AgriCOP ukai semina ngedut takah servis Opis Betanam Betupui (DOA) enggau komuniti genturung pendiau enggau rumah panjai aja, tang mega nyadi nalan bedua penemu enggau bekunsi chara betanam betupi moden ngagai raban orang bumai.
“AGRICOP tu siti program ti diatur kitai ngambi ngaul komuniti ti diau ba genturung pendiau tauka rumah panjai semak agi.
“Program tu mega nyadi pelasar ngagai DOA bekunsi penerang enggau chara pemadu baru ba sektor betanam betupi ngambi orang dagang nyamai gawa lalu ngentapka penuduk sektor betanam betupi,” ku iya ba mua mayuh rambau pengawa nangguh AgriCOP di Rumah Tabor Lasah, Sungai Sera, Sebauh, kena Hari Lima.
Iya nyemetak madah ke tuju AgriCOP nya diatur ngambi matak graduet biak enggau raban nembiak rindu ngaul diri ba sektor betanam betupi ti diatu nyamai agi dikereja ari pengawa bekenaka mesin teknologi moden enggau bemacham inisiatif perintah baka rumah bekibung, betanam betupi pintar enggau agropark.
Ku iya, teknologi ngena Internet Benda (IoT) udah belabuh dikena ba pengawa betanam betupi moden, nyengkaum ba Palan Latih Betanam Betupi (ATC) Sungai Sebiew ti ngemansangka projek betanam betupi meruan (precision farming).
“Ari teknologi tu, kereja ba kebun ulih dipatau ari jauh ngena internet, lalu enda entu bepanggai ba pengereja gawa.
“Aku ngarap ke rebak biak berani belajar ke teknologi baru tu nengah latih ti disedia, ke alai sida deka diberi plot tanah enggau rumah kibung nyadi model ngambi ngepunka pengawa betanam betupi moden,” terang iya.
Ngenang pasal perambu projek agropark, iya muji penau Tuai Rumah Tabor gawa ti chukup regas nyukung inisiatif perintah, tang tetap minta komuniti pintar milih produk ti bisi pengulih besai ari sukut rega ba makit enggau peminta.
“Kitai dekaka bala tuai ba renggat genturung pendiau enggau rumah panjai nyadi jematan ngagai perintah ba pengawa betesauka program enggau inisiatif ti ulih ngangkatka tikas ekonomi ruang bilik.
“Taja pia, tetiap projek patut diperati ari sukut reg aba makit ngambi pengawa tu endang ulih meri asil,” ku iya nyemetak.
Dato Sri Dr. Stephen Rundi mega ngarap ke semua penemu ti dipelajar nengah AgriCOP semampai dikena nentuka sektor betanam betupi terus mansang, kelimpah meransang raban orang bumai nyikap diri ngena penemu IoT ngambi enda tinggal dibanding menua maju ti diatu semua bepanggai ba teknologi pintar.
Ba pengawa nya, iya mega bisi ngemendarka agih belanja RM300,000 nengah Program Transformasyen Menua Pesisir (RTP) ngagai Rumah Tabor Lasah sereta RM30,000 da ngagai Komiti Pemansang enggau Pengelikun Genturung Pendiau (JKKK) rumah panjai nya.
Seraya dua Sapit Menteri M-FICORD, Datuk Dr. Abdul Rahman Ismail enggau Datuk Maclaine @ Martin Ben bela meri RM10,000 ngagai Biro Indu Rumah Tabor Lasah.
Sama datai, Residen Bagi Menua Bintulu Datu Nyurak Keti enggau Direktor Opis Betanam Betupi Sarawak Dominic Chunggat.-EDISI UKAS
