KUCHING: Ordinan Pemansang Berumah (HDO) enggau Ordinan Begunan Berumah disadang dibantai maya Aum Kunsil Nengeri (DUN) Sarawak ila.
 
Sapit Premier Sarawak, Datuk Amar Prof. Dr. Sim Kui Hian madah ke ordinan nya beguna endar dikena nentuka Sarawak terus tetangkupka peminta kemaya hari kelimpah negapka autonomi nengeri ngatur pengawa berumah.

“Aku udah dipadahka Luyar Besai Nengeri (SAG) ke alai Ordinan Pemansang Berumah enggau Ordinan Begunan deka dibantai maya aum ti deka datai.
 
“Kitai endang dekaka pekara tu diadu laban mayuh raban bisi kaul besai nyengkaum Serakup Pemaju Berumah enggau Retatanah Sarawak (SHEDA), Bomba enggau Gerempung Arkitek Malaysia-Pampang Sarawak chukup besai jasa ba pekara tu.
 
“Tuju pengawa tu nangkup peminta kemaya hari enggau negapka hak Sarawak nengah autonomi,” ku iya.
 
Iya nibar ke jaku nya ba mua mayuh serimbai Ekspo Retatanah SHEDA ba Palan Konvensyen Borneo Kuching (BCCK) kena Hari Lima.
 
Iya nerang, mayuh raban nyengkaum SHEDA, Bomba enggau Gerempung Akitek Malaysia-Pampang Sarawak (PAM) besai jasa ba pengawa tu laban meseti segulai sejalai ba pemansang kemaya hari.

Datuk Amar Profesor Dr. Sim mega bisi nyebut pasal sukung belanja ungkup SHEDA: ENCORE, enggau madah ke bantu ulih diberi nengah mayuh agensi, tang Premier Sarawak deka ngatur pekara nya.
 
Iya mega madah ke agensi bukai nyengkaum Kaunsil Pemansang Industri Berumah (CIDB) Malaysia tau nyendiaka agih belanja, tang bantu ari Premier deka nyukung pengawa nya. -EDISI UKAS