KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini Toh Puan Datuk Patinggi Fauziah Mohd Sanusi udah ngatur pengawa betemu sereta makai lemai begulai enggau Sapit Premier Sarawak ditu, lemai Hari Empat tu tadi.

Temuai khas ba pengerami makai lemai nya, Datuk Amar Douglas Uggah Embas, Datuk Amar Awang Tengah Ali Hasan enggau bini Dato Dayang Morliah Awang Daud sereta Datuk Amar Prof. Dr. Sim Kui Hian enggau bini Dato Enn Siok Ean.

Bela datai maya nya, anak Tun Pehin Sri Dr. Wan Junaidi enggau Toh Puan Datuk Patinggi Fauziah iya nya Sharifah Fariah, Sharifah Nong Jasmina enggau Tasneem.

Pengawa betemu sereta makai lemai nya mega dikena berandau isu maya hari tu bekaul pemansang enggau undang-undang atur perintah nengeri Sarawak.

Tun Pehin Sri Dr. Wan Junaidi ngarap Sarawak deka majak ngasaika pengelantang sereta pemansang ti komprehensif nengah raban tuai nengeri ti bepengelandik, bepenemu jauh sereta semampai bekerejasama rat ungkup pengelantang rayat.-EDISI UKAS

Gambar: Astana Negeri Sarawak