KUCHING: Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar enggau bini Toh Puan Datuk Patinggi Fauziah Mohd Sanusi udah nerima penemuai basa ari deligit Universiti Teknologi Sarawak (UTS) ti betuai ke Sapit Menteri Pelajar, Inovasyen enggau Pemansang Penau Sarawak, Datuk Dr. Annuar Rapaee, kena Hari Empat tu tadi.

Deligit nya bela digulu Mandal Chanselor UTS, Prof. Datuk Dr. Khairuddin Ab. Hamid sereta bala pegawai kanan universiti ke bukai.

Tuju penemuai nya deka ngelalu ke penatai Tun Pehin Sri Dr. Wan Junaidi enggau bini ngulu Program Statesman’s Lecture, Book Talk & Book Launch ke deka diatur di UTS kena 30 Ogos 2025.

Ba pengerami nya ila, dua karang ke ditengkebang Tun Pehin Sri Dr Wan Junaidi deka dilanchar, iya nya Teriso’s Little Star enggau Silence. Teriso’s Little Star, jerita pengidup iya ke ada ba Kampung Pendam lalu besai di Teriso.

Silence, iya nya siti antologi sajak ditengkebang begulai enggau Diana Ningkan sereta Yusuf Mustanir.

Tebal agi leka antologi tu datai ari jerita pejalai pengidup Tun Pehin Sri Dr Wan Junaidi. -EDISI UKAS

Gambar: Astana Negeri Sarawak