KUCHING: Integriti enggau pemeruan rampa menua patut digagaka nyadi pugu ba tiap bengkah perambu pemansang sereta ngatur pengeraja asal dikena nentuka ekonomi enggau rampa menua sebela.

Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh madah, integriti gadung enggau atur perintah ti manah patut nyadi pugu ba pengawa ngatur pesaka rampa menua Sarawak.

“Aku temegah ati meda pengeransing Sarawak nyungkak pemeruan rampa menua.

"Pemujur Sarawak ba sektor kampung, biodiversiti enggau environmental intergriti baikka ba menua tauka antarabansa endang engkeman. Tu nyengkaum program ngintu kampung, 'rewilding' enggau bukai,” ku iya.

Iya madah munyi nya maya ngari Sapit Premier Sarawak, Datuk Amar Awang Tengah Ali Hasan ba Program Hari Integriti Opis Menteri Pengeraja Asal enggau Pemansang Mengeri 2025, Hari Lima.

Nambah ke jaku iya, iya madah, Sarawak udah nurai macham pemujur ba inisiatif nyaga rampa menua, sebagi ari program baka program konservasyen kampung enggau landskap kenyau taun 2019 ti seriris enggau Kimpin Gadung Malaysia.

Kelimpah ari nya, ku iya, semak 50 peratus kandang kampung nengeri diatu udah diaku nengah Malaysian Timber Certification Scheme (MTCS) lalu Taman Negara Mulu udah diaku nyadi Palan Pesaka Dunya UNESCO.

Sarawak mega benung ransing deka ngaga Taman Negara Bako enggau Bukit Lambir digazet nyadi ASEAN Heritage Park sereta ngulihka aku ari UNESCO Global Geopark ungkup Sarawak Delta Geopark taun 2026.-EDISI UKAS