SARATOK: Sepenyampau RM6.7 juta deka diungkup dikena nyungkak sektor betanam betupi ba sitak Kunsil Nengeri (DUN) Kalaka ke mungkur sekeda pejalai projek betanam betupi.

Kaban Kunsil Nengeri (ADUN) Kalaka, Mohamad Duri madah, pejalai projek betanam betupi tu disadang meri empas terus ngagai beratus peranak menua nya.

Iya madah, sekeda projek besai udah dipejurai nengah belanja ari Agensi Pemansang Bagi Menua Betong (BDDA).

Iya nyebut munyi nya maya betemu enggau Tuai Genturung enggau Tuai Bansa (KMKK) sereta raban Opis Betanam Betupi Betong/Saratok, Hari Empat.

Projek besai nya nyengkaum pengawa ngaga jalai ke umai di Tanjung Teras, Kupang (RM1 juta), jalai kebun di Sungai Tali Paun, Seberai Pasar Roban (RM2 juta), pengawa ngaga kilang beras di Kaba (RM2.8 juta) enggau jalai kebun bukai di sitak Kalaka (RM900,000).

Projek tu ukai semina deka nambah infrastruktur betanam betupi aja tang mega muka peluang baru ba rentayan pemakai, pengawa proses asil betanam enggau nambah asil penatai pemisi orang ke bekebun.

Pengawa numbuh kilang beras, lebih agi dipeda nyadi penyungkak strategik dikena ngenegap ekosistem ngeluar padi menua lalu ngurangka pengawa bepanggai enggau proses ba luar.

Kelimpah ari pemansang infrastruktur, sektor betanam betupi bela nerima bantu lebuh Opis Betanam Betupi madah meri baja sawit enggau lada renggat keempat ngagai 272 penerima di sitak Kalaka dikena nyaup ngurangka ungkus ngeluar sereta nambah asil kebun sida.

Sama datai, Pegawai Pelilih Saratok Mohamad Dino Amit, Pegawai Betanam Betupi Bagi Menua Betong Leo Tony enggau Tuai Pegawai Eksekutif BDDA Abang Mohamad Abang Turkey. -EDISI UKAS