SRI AMAN: Pesta Benak Sri Aman edisyen ke-22 ke dilanggur diatur ari 19 ngagai 21 September tu lagi disadang nurai mayuh agi orang datai enggau bemacham program baru sereta beberapa pekara strategik dikemanah.
Sapit Menteri Pemansang Penau Sarawak ke mega Kaban Kunsil Nengeri (ADUN) Simanggang, Datuk Francis Harden Hollis madah pesta nya mandangka bemacham aktiviti bepelasarka penyelai pangka pasang benak di Sungai Batang Lupar ke semina bisi ba Sri Aman.
“Entara batang program nyengkaum Regatta Benak Batang Lupar, Benak Road Trail Run, Miss Tourism Benak 2025, Panggau Penyerakup, Pemandang Orang Dagang Bumiputera, sereta pemerindang Raban Soldadu Malaysia begulai enggau komuniti.
"Kitai deka Pesta Benak terus nyadi kelai identiti enggau ke dikemegah peranak menua Sri Aman,” ku iya maya dirandau ba program KUPPA KUPPI RTM, kena Hari Tiga tu tadi.
Kelimpah ari nya, Residen Sitak Sri Aman ke mega Chairman Komiti Besai Pesta Benak 2025, Mahra Salleh madah, bisi sekeda pekara strategik dikemanah dikena meri peneleba ti manah agi ngagai mensia mayuh ke deka datai.
Ku iya nerang, entara pekara ke dikemanah nyengkaum, nusun baru kedai bejual nitih kluster, nyendia ke agu ulih dipindah ti chukup, jadual meresi ti sistematik agi sereta nyungkak penyereta orang dagang enggau IKS menua dia.
"Kitai mega deka ngelancharka 'website' enggau aplikasyen Pesta Benak dikena ngemuntangka akses penerang ngagai mensia mayuh,” ku iya nerang.
Pegawai Pelilih Sri Aman ke mega Chairman Komiti Regatta Benak Batang Lupar, Sharrif Bujang, nyemetak madah, program regatta deka terus nyadi batang pematak pesta, kelimpah ngelakuka Sungai Batang Lupar nyadi produk dagang temuai ke bisi pengulih tinggi.
Program Soft Launching Pesta Benak 2025 deka dipenyadi ADUN Lingga, Dayang Noorazah Awang Sohor kena 19 September tu, lalu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg disadang bejadi pesta kena 20 September.
Pia mega, Program Nutup deka dipenyadi Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi kena 21 September di Panggau Besai Waterfront Sri Aman.
Berambai jaku 'Terokai Keunikan dan Cabaran Fenomena Benak di Batang Lupar, Sri Aman, Sarawak', pesta tu dikeandal deka ngangkat Sri Aman nyadi palan dagang temuai betikas antarabansa, lalu mai pemaik ekonomi enggau rama ngagai rayat menua tu. -EDISI UKAS
