SARIKEI: Bemacham projek besai empas ti dipejalai ngangkatka Sitak Sarikei nyadi sebagi ari kandang menua di Sarawak ti majak deras mansang ari sukut pemansang enggau ekonomi.
Bechunto ke pengawa ngaga Jematan Batang Rajang, Sapit Menteri Pengeraja Asal enggau Pemeruan Rampa Menua, Dato' Sri Huang Tiong Sii madah, perengka guna besai nya ukai semina nambahka rentayan kaul entara kandang menua sepemanjai Sungai Rajang, tang mega meri empas positif ngagai pemansang sosioekonomi rayat Sarawak, lebih agi peranak Parlimen Sarikei.
Ku Kaban Parlimen Sarikei nya, jematan 1.4 kilometer pemanjai ti digaga enggau ungkus RM321 juta nya mandangka perintah nengeri ransing ngemansangka kandang menua pesisir.
“Projek tu besai reti ngagai aku, laban tu pekara ti suah dipinta aku kenyau ari terubah aku nyadi pengari rayat Parlimen Sarikei.
“Jematan Batang Rajang mandangka pengeransing perintah nengeri betuai ke YAB Premier, ngemai Sarawak, nempa menua dudi hari ti mansang agi, inklusif sereta lantang,” ku iya.
Iya madah munyi nya maya sesyen randau eksklusif begulai enggau Unit Komunikasi Awam Sarawak (UKAS) serimbai pengerami ngintu Hari Kebangsaan 2025 Renggat Nengeri Sarawak di Palan Servis iya, apin lama ti udah.
Maya ti sama, iya beterima kasih ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau Sapit Premier Sarawak, Datuk Amar Douglas Uggah Embas ti udah nangkup peminta peranak ditu ti randakka perengka guna pemun meruan kenyau suba nyadi nyata.
Ke penemu mayuh, Jematan Batang Rajang ti dipenyadi kena 17 Mei 2025 udah dibali nama nyadi Jematan Tun Datuk Patinggi Tuanku Haji Bujang bin Tuanku Othman.
Dato Sri Huang madah baru, Perintah mega deka bejalaika sekeda projek pemansang besai ti nyerangkung infrastruktur, perengka guna mensia mayuh sereta nyungkak ekonomi menua ditu nengah nambah infrastruktur jalai alun ba kandang mengeri enggau menua pesisir.
Tu nyengkaum projek nyeleti jalai genturung pendiau enggau rumah panjai, ngaga sistem parit ti manah agi dikena ngurangka penanggul ampuh bah, ku iya.
Kelimpah ari nya, ku iya, projek ngaga Waterfront Sarikei ti deka dipejalai ari baruh Agensi Pemansang Delta Rajang (RADDA) ti digaga berenggat deka nyadi palan pematak dagang temuai baru enggau nalan aktiviti komuniti di Sarikei ila.
“Semua projek tu ungkup pengelantang rayat Sarikei laban polisi YAB Premier kitai sigi ngemerat pemansang ba kandang menua pesisir.
“Iya deka ngedutka seraka pemansang ba kandang mengeri enggau menua pesisir ngambi semua rayat Sarawak ulih ngasai pengelantang ekonomi baka ke dirintai ba Pelin Pemansang Udah COVID-19 (PCDS) 2030,” ku Kaban Kunsil Nengeri (ADUN) Repok nya.
Berindik ari nya, Dato Sri Huang meransang semua rayat nengeri tu majak nyukung perintah Gabungan Parti Sarawak (GPS) betuai ke Datuk Patinggi Abang Zohari nentuka semua perambu pemansang di Sarawak, lebih agi ba Sarikei ulih diteruska ungkup pemaik semua.
“Nengah visyen YAB Premier enggau perambu holistik, perintah nengeri, aku andal Sarikei deka nempa transformasyen, ari pelilih jauh nyadi entara palan ekonomi besai ba kandang tengan Sarawak ke deka nyaup pemansang nengeri tu,” ku iya.
Ke simpul jaku, iya meransang semua rayat Sarawak lebih agi ke ba Sarikei ngambi sama ngerichah Hari Kebangsaan enggau semangat penaluk.
Iya nyemetak madah, kelimpah pengerami ngintu Hari Sarawak enggau Hari Malaysia ti bela dirami ditu, Hari Kebangsaan mega nyadi pelasar negapka agi kaul serakup pupu raban bansa di menua tu, setipak enggau aspirasyen Malaysia MADANI. - EDISI UKAS
