KUCHING: Pengeransing Sarawak ngintu endur jelu mayas diau nerima sukung tegut ari komuniti antarabansa, lebih agi Jepun.

Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, Penyeraris Nengeri Sarawak ungkup Gerempung Malaysia-Jepun Sarawak, Kazue Sakai udah lebih 40 taun bekunsi penerang bekaul pengawa nyaga mayas nengah kereja seni bepelasarka mayas kelimpah mai nembiak, pemansik enggau orang dagang Jepun ke Sarawak nanam pun kayu sereta nyaup pengeransing nyaga.

“Kerejasama baka tu ukai semina nyungkak pengeleda global, tang mega ngelakuka Sarawak nyadi palan pansik enggau ekodagang temuai,” ku iya nerang ba Program Nyua Gambar Dero Mayas Ngena Minyak di Wisma Sumber Alam, Hari Empat.

Iya madah, penyampau mayas di Sarawak diatu dipelaba urung 2,500 iku, jauh mimit ti dibanding ba Sabah enggau Kalimantan, tang program nyaga jelu tu di Semenggoh Nature Reserve udah mandangka asil positif ti ngerikod mayuh anak jelu mayas ada.

“Pengawa ngibun jelu mayas di Semenggoh nyelai laban mayas nya ditejuka idup nadai dikachau mensia, bebida agi ari palan nyaga bukai,” ku iya.

Datuk Len Talif nyemetak madah, pengawa ngintu biodiversiti Sarawak patut diteruska nengah kaul komuniti menua, agensi perintah enggau bakih kerejasama antarabansa ngambi utai tumbuh enggau utai idup majak dijaga ungkup rebak dudi.-EDISI UKAS