KUCHING: Pengerami Ngintu Hari Malaysia 2025 Renggat Sarawak ke deka diatur di Bintulu deka mandangka pemujur enggau pemansang nengeri tu kenyau Malaysia ditumbuh sereta meri perati pemansang deras di Bintulu nyadi kluster industri baru enggau rambai jaku 'Sarawak Maju Makmur Dalam Malaysia'.
Menteri Industri Pemakai, Komoditi enggau Pemansang Kandang Menua Sarawak ke mega Menteri Pengatur Pengerami Ngintu Hari Malaysia 2025 Renggat Sarawak Dato Sri Dr Stephen Rundi Utom madah, pengerami ngintu sekali tu deka berengkah ari 14 September enggau Program Selamat Pengarap Bukai ke diatur Unit Pekara Pengarap Bukai (UNIFOR) ditangkan enggau Program Selamat ke diatur di Masjid Assyakirin kena 15 September.
Lalu maya pagi 16 September deka diatur Marathon Hari Malaysia, ditangkan batang pengerami ke deka diatur ba Padang Bilun Lama Bintulu lalu urung 10,000 iku mensia mayuh disadang datai.
"Pengerami tu deka nyadi palan alai mandangka pemansang Sarawak enggau chara ti komprehensif, iya nya maya suba, maya hari tu enggau dudi hari.
"Bela diayan iya nya Bintulu ke nyadi kluster industri baru, baka dipadah ba Forum Ekonomi Dunya.
"Nya alai, kitai amat nganti pengerami ngintu Hari Malaysia 2025 di Sarawak, ke deka mandangka pemujur besai nengeri tu, lebih agi di Bintulu," ku iya.
Iya madah munyi nya ba aum media pengudah ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi, Petra Jaya, Hari Tiga.
Nambah ke jaku iya, iya madah, pengerami ngintu nya mega berati ke pemansang pengawa berumah enggau kandang industri baka di Samalaju nyengkaum kandang endur baru baka Jepak Jaya ke diperambu dikena ngurangka penyekut di mengeri Bintulu.
Dato Sri Dr Stephen Rundi madah, Premier Sarawak udah setuju bekaul program ke deka diatur.
Ku iya, Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar deka datai nyadi temuai dipebasa begulai enggau Premier Sarawak enggau raban pemesai nengeri ke bukai.
"Kami diatu benung nyikap kepenudi semua program ke udah dilanggur. Kami mega udah nyendiaka sebuah video ke deka ngayanka pemansang Sarawak, lebih agi di Bintulu enggau mega mengeri bukai ba nengeri tu.
"Nengah pemandang nya, kitai deka mandangka bakani Sarawak udah bulih pemaik kenyau ari mutus begulai numbuh Malaysia. Nya alai rambai jaku pengerami ngintu sekali tu ‘Sarawak Maju Makmur Dalam Malaysia’," ku iya.
Bela datai ba aum medi, Residen Sitak Bintulu Datu Nyurak Keti enggau Direktor Unit Protokol, Istiadat Enggau Pengatur Program Sarawak Datu Hamdan Sharbini. -EDISI UKAS
