KUALA LUMPUR: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi datai bejadika Pengerami Makai Lemai Menteri serimbai Forum Undang-Undang ASEAN (ASEAN Law Forum) 2025 di Palan Konvensyen Kuala Lumpur (KLCC), kena Hari Tiga tu tadi.

Penatai Tun Pehin Sri Dr Wan Junaidi enggau Datuk Patinggi Fauziah diambat Menteri Undang-Undang enggau Reformasyen Institusyen Malaysia, Dato’ Seri Azalina Othman Said, disempulang Menteri Dagang Temuai, Industri Kreatif enggau Seni Pemerindang ti mega Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah sereta bini, Datin Sri Zuraini Abdul Jaabar.

Tun Pehin Sri Dr Wan Junaidi malu tawak tiga kali kelai bejadi, nandaka pengawa ti ngempuru lebih 300 penyereta datai ari pakar undang-undang, akim, luyar enggau pemelajar serantau belabuh diatur.

Tembu makai lemai, Tun Pehin Sri Dr Wan Junaidi enggau Datuk Patinggi Fauziah sereta Dato’ Seri Azalina mega bejadika aktiviti ngelinsu batik ke ditulis ASEAN sebedau sama ngulu pengawa makai rian di Sky Garden, Ringkat 6 KLCC.

Entara pemesai bukai ti sama datai, Sekretari Besai ASEAN, Dr Kao Kim Hourn, Yang Dipertua Dewan Negara, Dato Awang Bemee Awang Ali Basah, Presiden Kort Apil, Dato’ Abu Bakar Jais, Tuai Akim Kort Tinggi Malaya, Tan Sri Hasnah Dato’ Mohamed Hashim sereta Tuai Akim Sabah enggau Sarawak, Dato’ Hajah Azizah Nawawi.

Bela datai, bala Menteri enggau Sapit Menteri Undang-Undang menua ASEAN nyengkaum Timor Leste.

Lebuh bejaku, Tun Pehin Sri Dr Wan Junaidi ngarapka Forum Undang-Undang ASEAN 2025 ke diatur ari 19 ngagai 21 Ogos nyadi pelasar bulih penemu sereta pemutus dikena napi pemar baru bekaul undang-undang nyengkaum teknologi, rampa menua enggau hak pemun mensia.

Iya andal ke forum nya ngayanka pengeransing Malaysia negika undang-undang lalu ngenegap kerejasama bekaul undang-undang di rantau ASEAN.-EDISI UKAS